MINENHLE MKHIZE
I ZALELWE yinja endlini iThanda Royal Zulu esiphenduke inqola yomtapo wamaphuzu kuNational First Division (NFD) njengoba ngempelasonto imuhluzwe yi-United FC phambi kwabalandeli bayo eMhlathuze Sports Complex.
URonnie Moroka ubhabhadiswe ngo 4-0 yi-United FC emdlalweni wakhe wokuqala ebambe izintambo selokhu kugudluzwe uMlungisi “Professor” Ngubane okuthiwa usengumqondisi wosomaqhinga kuleli qembu eliyithemba leKwaZulu-Natal (KZN) kuNational First Divisioon (NFD).
IThanda isiphenduke inqola lapho wonke amaqembu eNFD ezitamuzela khona amaphuzu njengoba ihlezi ekugcineni ku-log ngamaphuzu amahlanu ngemuva kwemidlalo eyisishiyagalombili.
Okwenza izinto zibe nzima wukuthi emdlalweni olandelayo leli qembu, elizowudlala ngaphandle komdlali walo omqoka uVelile Zitha othole ikhadi elibomvu, elibukeke lingamfanele, lizogadulisana neMilano United FC ngoNovemba 23 eWynberg Military Base, eKapa, ngo-3.30 ntambama.
IMilano iyona ehlezi esicongweni futhi ngemuva kwemidlalo eyisishiyagalombili ayikaze ishaywe. Isinqobe imidlalo eyisikhombisa yadlala ngokulingana kwemibili kanti ayikaze ishaywe yiThanda emidlaweni emithathu esiyidlale naleli qembu laseKZN.
Ekhuluma naleli phephandaba ngemuva komdlalo uMoroka uveze ukuthi uyalwazi utaku azifake kulona njengoba evumele ukuphendulwa ompushana yi-United FC naye ebibhinjelwa yizinto kulesi sigaba.
“Ngiyazi ukuthi njengoba sishaywe ngo 4-0 abantu bazolahlekelwa yithemba bathi uRonnie akazi lutho kwazise ngiyaqala ukuqeqesha.
“Nokho ithemba angililahlile ngoba sizoqhubeka nokulungisa lapho kuxega khona. Ngizophinde ngikucacise lokhu, inkinga bekungeyena umqeqeshi omdala kodwa kunezinkinga ezingaphezu kwalezi ebesizicabanga. Kodwa sizoqhubeka nokuzama ukuthola izixazululo,” kusho uMoroka.
Amabhubesi agcine ukunqoba ngo-Septhemba 29 ehlula iVasco Da Gama ngo 1-0 eMhlathuze Sports Complex. Ngemuva kwalo mdlalo aseshaywe imidlalo emihlanu enganqobi. Adlale ngokulingana neChippa United ngo 1-1 ekhaya, abhambabulwa yiSivutsa Stars ngo 1-0, aphinde amuhluzwa yiMaluti FET College ngo 1-0 ngaphambi kokuthelwa othulini yiBlack Leopards.
“Abadlali esibafakile ngesiwombe sesibili basibulele kakhulu kwazise ngesikhathi sesidlala ngabadlali abangu-10 bese singabacindezeli ngendlela ebengibayalele ngayo.
“Ikhadi elibomvu lishintshe izinto eziningi ngoba senze izinguquko ebesingaqondile ukuzenza kodwa ngenxa yalo nokuthinteka kwabanye abadlali akukho ebengizokwenza,” kusho uMoroka.
Imenenja yeThanda uThabani Gumede iziqhathe nolaka lwePremier Soccer League (PSL) ifuna ukubamba unompempe ngezandla ngoba ingeneme ngezinqumo zakhe. Nokho uGumede uvumile ukuthi kufanele bangene emakethe bathenge abadlali abasezingeni eliphezulu.
Kuvele sekunemibiko yokuthi bacathamela uMkhanyiseli Siwahla ochithwe yiMpumalanga Black Aces emasontweni edlule.