ISILO,uMisuzulu Sinqobile kaZwelithini, sikhale ngomdonsiswano oqhubekayo wesihlalo sobukhosi eNdlunkulu kaZulu, sathi ubambezela intuthuko yomphakathi.
Besikhuluma ngesikhathi sethula inhlangano eqanjwe ngaso iKing Misuzulu Foundation eNazareth, ePinetown, izolo.
“Kube umzukuzuku ukuthi sizoyibiza ngeKing Misuzulu kanjani uma bengavumi ekhaya ukuthi ngiyinkosi yabo. Nina beNdlovu kodwa ngokuthola ithemba nokusebenzisana nohulumeni, sesilinde nje izitifiketi. Ngiyanithembisa nina sizwe sikaMageba ukuthi ngeke sisabuyela kule nto, sesiyinqobile njengegama lami, ” sisho kanje.
Sikhuluma kanjena nje, olunye uhlangothi lwasendlunkulu oluphikisana nokuthi lugcotshwe oluholwa uMntwana uMbonisi Zulu lufake amaphepha enkantolo emva kokuthi uMengameli Cyril Ramaphosa esethule njengenkosi yamaZulu.
ISilo besihambele umphakathi wakule ndawo owakhahlanyezwa yizikhukhula zango-Ephreli ukuzofeza isithembiso esasenza ngesikhathi sihambele lo mphakathi ngesikhathi senhlekelele ukuthi sizobuya sizokwelula isandla ukusiza abagilwa.
I-King Misuzulu Foundation ngokubambisana nenkampani ephisa utshwala iDiageo South Africa, banikele ngezijumbana zokudla emindenini engu-500 eku-ward 16, yabagilwa yizikhukhula. UMnuz Sibani Ngubane oyiCorporate Relations Director kule nkampani, uthe bathinteka kakhulu ngomonakalo owenziwa yizikhukhula.
“Ngesikhathi kufika izikhukhula, okwadingeka ukuthi abasebenzi bethu bathathwe yibhanoyi ukubayisa emakhaya bevalelekile, sibalekelele ngokuthile.
“Emva kokusiza abasebenzi bethu, sabona kunesidingo sokuthi selule isandla nasemphakathini, yingakho sisebenzisane nenhlangano yeSilo ukuqinisekisa ukuthi abagilwa bayaluthola usizo,” usho kanje.
Ikhansela kule ndawo, uMnuz Bongani uNgubane, lithe mathathu amahholo endaweni akhoselise abakhahlanyezwa yizikhukhula, lathi lezi zijumbana zizoze zinikwe namanye amalungu omphakathi angahlalisiwe emahholo kodwa adingayo.
UNksz Sindi Zondi owashonelwa izingane ezimbili, uZiyanda Tembe (12) noNtsika Tembe (4), ungomunye wabahlomule kulolu hlelo.
“Namanje kusebuhlungu kakhulu uma ngicabanga okwenzeka. Imfucuza eyayiqhamuka emizini engenhla, yawela lapho sihlala khona. Izingane zathuka zaphumela ngaphandle ngisaphumile ngithi ngiyozama usizo, ngebhadi zamuka nezikhukhula,” usho kanje.
Uthe usahlala kuyo leyo ndlu emva kokuzama ukuyilungisa.Umculi kamaskandi uKhuzani Mpungose unikele ngoR30 000 kwiKing Misuzulu Foundation ngenhloso yokuyilekelela iqhube umsebenzi wokusiza umphakathi.