ISILO uMisuzulu kaZwelithini, sithi sekufanele kushwelezwe emsamo nasesibayeni kukhuzwe umuga wezingozi zomgwaqo ezihlasele isifundazwe.
OkaMdlokombane ubekhuluma ngesikhathi kugujwa Umkhosi weLembe, enkundleni yezemidlalo eStanger High, KwaDukuza izolo.
UMkhosi weLembe kusuke kukhunjulwa ngawo iSilo saKwaDukuza uShaka kaSenzangakhona esakhothama ngoSepthemba 1828.
Isigodlo nedlinza leSilo uShaka kuKwaDukuza, okuyisizathu esenza umcimbi ugujwe khona minyaka yonke.
UNomthebe wesizwe ukhuluma kanjena nje, izolo bekungcwatshwa izingane zesikole, ezingu-18 nabadala abathathu abashone engozini yomgwaqo oPhongolo. Kwezinye izingozi ezibhokile esifundazweni kukhalwa ngamaloli.
IMbube ithe kufanele kuhlanganiswe amakhanda, kube khona okwenziwayo ngodaba lwezingozi ezixakile. OkaNdaba bekungokokuqala ethula inkulumo kugujwa uMkhosi weLembe ngoba ngonyaka odlule akayethulanga ekhala ngokungazizwa kahle. ISilo sithe sikhathazeke kakhulu ngezingozi zomgwaqo, kukhona okufanele kwenziwe.
“Kanti soneni kangaka ngoba sehlelwa yizinto ezimbi kangaka? Kufanele sibuye emsamo nasesibayeni nasemthandazweni sishweleze. Amaloli emgwaqweni ande kakhulu kunayizolo. Ngiyacela sehlise ijubane. Ngiyababaza, ngiyakhala sizwe sikaMageba, ukuthi sihloniphe ngoba saziwa ngayo inhlonipho,’’ kusho iSilo.
ISilo siphawule ukuthi izingozi zibhoka nje kade kusanda kubatshazwa izikhukhula ngasekuqaleni konyaka, ezashiya kukhalwa esifundazweni ikakhulu eThekwini. ISilo sithe konke lokhu kukhomba ukuthi kukhona okungahambi kahle. UBayede uphinde wabonga isizwe ngokumeseka ngesikhathi esinzima sombango wesihlalo.
ISilo sethule inkulumo izolo kade sigubha usuku lwaso lokuzalwa ngoLwesihlanu, sihlanganisa iminyaka engu-48 sabona ilanga. Kulindeleke ukuthi kube nendumezulu yomcimbi lapho iSilo sizonikwa khona isitifiketi ngokusemthethweni.
Umcimbi uzoba senkundleni iMoses Mabhida eThekwini ngenyanga ezayo ekupheleni kwayo.