LIKWAMUKELE ikomiti lezeNhlalakahle ePhalamende kanjalo neSassa ukululwa kwesikhathi sokusebenza kwamakhadi amadala ayigolide akwaSassa, kuze kube isekupheleni kukaMeyi nonyaka, kulabo abangakashintsheli emakhadini amnyama asePostbank.
Lesi sinyathelo sizosiza abantu ababalelwa ku-800 000 abangakawashintshi amakhadi abo kuleli.
Ibamba lesikhulu esiphezulu sakwaSassa, uMnuz Themba Matlou, sithe lesi sinqumo senziwe ukuze kusizakale abasasilele emuva abangakawashintshi amakhadi abo.
UMatlou uthe abafuni abantu batatazele bathuthelane ngomzuzu wokugcina sebeyoshintsha amakhadi.
"Sinxusa abangakawashintshi amakhadi abo ukuthi bayowashintsha bangayi ngomzuzu wokugcina. Kubalulekile ukuthi amakhadi ashintshwe ukuvikela abantu abathola izibonelelo."
Isikhulu esiphezulu sePostbank, uNksz Nikkie Mbengashe, sikhuluma esithangamini nabezindaba muva nje, sithe ngeke usabakhona ushwele kulabo okuzophela uMeyi 31, 2025 bengawashintshile amakhadi abo.
Uthe amakhadi amadala ngeke esasebenza ngemuva kwalolu suku wathi abantu abasheshe bawashintshe amakhadi abo amadala.
"Amakhadi amadala ayigolide akwaSassa, asasebenza, abantu abangashintshele kwamasha basazoyithola imali yabo ngo-Ephreli nangoMeyi. Kodwa ekupheleni kukaMeyi ngeke besayithola," usho kanje.
Uxwayise abazolinda emathonsi abanzi bangawashintshi amakhadi ukuthi bazothi beya ngomzuzu wokugcina bafice ujenga lolayini.
Uphinde wanxenxa abahola izibonelelo ukuthi bangayi ukuyohola emaposini ngoba ngeke basizakale.
"Amakhadi asebenza ezitolo kanjalo nasemishinini ama-ATM. Labo abasebenzisa amakhadi iMzansi Flexi, abavele behola emaposini abaqhubeke baye kuwona ukuze bathole imali yabo. Abanye abanamakhadi amadala, noma amasha abaye ezitolo noma kuma-ATM."
Usihlalo wekomiti ePhalamende uNksz Bridget Masango, unxuse abantu ukuthi bayoshintsha amakhadi ngoba ngeke sisalulwa isikhathi.
"Lokhu kusho ukuthi uma kuphela lezi zinyanga ezimbili ungalishintshile ikhadi lakho ngeke usasithola isibonelelo sakho. Siyakweseka ukululwa kwesikhathi sokushintshwa kwamakhadi ngoba kuzosizakala abasezinhlelweni zokushintsha," usho kanje.
Ngaphambi kokululwa kwesikhathi kube nokukhathazeka ngokuthi ngabe amaposi azokwazi yini ukumelana nomthamo wabantu abebezothutheleka kuwona ukuhola isibonelelo sabo njengoba abangashintshile amakhadi bebeyalelwe ukuthi baye kuwona.
Okunye obekukhalisa ngukuthi inqwaba yamaposi kuleli seyavalwa, ngakho bekuzoba nzima ukuthi bantu bathole izibonelelo.