INKANTOLO eNkulu yaseMgungundlovu, ibabaze isihluku kubabulali, igweba abayisishiyagalombili ngamacala okubulawa kwabantu ehostela eGlebelands eMlaza, izolo.
UBhekukwazi Mdweshu (40) owayeyiphoyisa eDurban Central, Khayelihle Mbuthuma (39), Vukani Mcobothi (35), Eugene Hlophe, Ncomekile Matlale Ntshangase (39) oseke wasebenza njengesosha embuthweni wezokuvikela noMondli Mthethwa (34) bagwetshwe iminyaka ewu-10 ngamacala amane okuzama ukubulala, kwathi kuyona balengiselwa emihlanu umuntu ngamunye ngombandela wokuthi bangatholwa benecala elifanayo
UMdweshu noMcobothi baphinde bagwetshwa iminyaka ewu- 10 ngamacala okuhlela itulo lokubulala, kanti uMbuyiseni Mkhize (36),uMcobothi noMbuthuma bagwetshwa odilikajele icala ngalinye ngamacala kwawokubulawa koMnuz Thulani Khathi, William Mthembu Thokozani Machi, Thhemba Mpina, Sipho Ndovela noMnuz Sunnyboy Ndovela. Abanye abathole odilikajele ababili kuleli cala uMondli Mthethwa othole ababili ngokubulala oMnuz Lucky Mtwa noMzwandile Gawuza, kwathi uMbhele wanikezwa ababili kwelokubulala uMthembu noMachi.
UMthethwa uphinde wagwetshwa iminyaka ewu-10 kwelokutholakala nesibhamu esingekho emthethweni nonyaka kwelokutholakala nezinhlamvu.
Zonke izigwebo abanikezwe zona bazozidonsa kanye kanye.
IJaji uNkosinathi Chili ngaphambi kokukhipha isigwebo, uthe kubagilwa abayisikhombisa ababulawa, munye kuphela isidumbu sakhe esatholwa sinamanxeba okudutshulwa esifubeni, kanti bonke abanye abagilwa babedutshulwe ekhanda.
"Ngaphandle kukaMtwa owayedutshulwe esifubeni, bonke abafa kulezi zigameko zokuhlaselwa badutshulwa ekhanda okukhombisa ukuthi babulawa ngesihluku. Abalahlwe amacala okubulala, bakhombise ukuthi abanendaba njengoba kwabafayo kuwuMnuz Sipho Ndovela kuphela owadutshulwa ebusuku, bonke abanye badutshulwa emini kabha kubuka wonke umuntu futhi bengazifihlile ubuso," usho kanje.
Uthe kwizethulo ezenziwe abameli babo, bakuvezile ukuthi lezi zinkabi sezihlale iminyaka emihlanu ezitokisini selokhu zaboshwa ngo-2017, wathi lokhu akumenzi aguquke ezigwebeni ezimiselwe amacala abucayi njengalawa. Uveze ukuthi ukubambezeleka kwezinhlelo zokuqhubeka kwecala, nabo abagwetshiwe babenesandla kulokho njengoba kwesinye isikhathi bekuba nokushintshwa kwabameli, kanti nokuvalwa thaqa kwezwe ngenxa yobhubhane iCovid-19 kube nomthelela.
Yize bekuwusuku lokugwetshwa kwabo, kodwa bebebonakala bekhululekile bezixoxela behleka, futhi bengenankinga nabebethwebula izithombe