ZIVUME ngo-elethu izindlu zakwaButhelezi eziwu-22, ukuthi inkosi uNtuthukoyezwe Zuzifa Buthelezi, ifanelwe wukuthatha isihlalo sobukhosi esishiwe nguyise ongasekho. Inkosi Mangosuthu Buthelezi, ibiyinkosi nondunankulu kaZulu, ikhothame ngoSepthemba emuva kokudunguzela.
Inkosi entsha yakwaButhelezi iyizibulo likaShenge ongasekho, alizalelwa nguNdlunkulu u-Irene Thandekile Buthelezi naye ongasekho emhlabeni.
UMntwana waKwaPhindangene ubengumsunguli we-IFP, owayihola isikhathi eside kanti ubeyilungu lePhalamende futh ubesedonse isikhathi eside cishe kunawo wonke.
Nakuba isikhundla sobukhosi bekungesakhe kodwa ubesibambise uMnuz Mpikayise Buthelezi. Okhulumela umndeni kaShenge, uDkt Ngqengelele Buthelezi, uthe kulandelwe yonke imicikilisho yokuhlonza inkosi.
Uthe kube nomhlangano kwavunyelwana ngodaba lobukhosi, wathi bazoxhumana nohulumeni bese kulandelwa konke njengokomthetho. Uthe okunye bazobuye bakuchaze ngokuhamba kwesikhathi ngalolu daba.