UCHAZWE njengeqhawe umholi we-MK KwaZulu-Natal, uMnuz Canaan Mdletshe, oshone engozini yomgwaqo.
Okhulumela i-MK, uMnuz Nhlamulo Ndhlela, uthe balahlekelwe umholi obezinikele ekulwelweni abantu abahlwempu.
UMdletshe obeyingxenye yethimba lesikhashana elihola i-MK KwaZulu-Natal, ushone engozini yomgwaqo emehlele eJozini.
UMdletshe uficwe ile ngozi ephuma kokhankasela ukhetho lokuchibiyela obeluseMtubatuba.
UNdhlela uthe uMdletshe ubezinikele kakhulu emsebenzini wakhe.
“Umkhonto wegwala ufela etsheni, uMdletshe ubengelona igwala. Wathatha owakhe umkhonto, walwela abantu bakuleli abahlwempu nabanganakiwe. Asisoze siwakhohlwe amagalelo akhe.”
UNdhlela uthe basashaqekile ngokushona kukaMdlesthe.
“Ayikhulumeki le ndaba. Sifisa ukudlulisa amazwi enduduzo emndenini wakhe. Sifisa ukuwuqinisekisa umndeni ukuthi sizoweseka kulesi sikhathi esinzima.”
Kuthiwa uMdletshe ubehamba yedwa emotweni ngesikhathi ehlelwa ingozi.
UMdletshe ushona nje, amalungu e-MK alungiselela umcimbi wokugubha unyaka kwasungulwa le nhlangano.
Umcimbi wokugubha unyaka kwasungulwa i-MK uzokuba ngesonto elizayo, eMoses Mabhida.
UMdletshe usanda kuqokelwa ethimbeni elihola i-MK KwaZulu-Natal, lapho efike wanikezwa khona umsebenzi wokuxhumanisa le nhlangano nabezindaba.
Wajoyina i-MK emva kokulaxaza i-NFP, emva kwesinqumo sayo sokujoyina uhulumeni wokubambisana ophethe isifundazwe iKwaZulu-Natal.
UMdlesthe wakhala ngesinqumo se-NFP sokukhetha ukusebenzisana ne-DA, akhala ngokuthi sicindezela abantu abamnyama.
UMdletshe wayefuna ukuthi i-NFP ibambisan ne-MK, okuyiyo eyathola izihlalo eziningi esiShayamthetho saKwaZulu-Natal.
Phambilini, uMdletshe wayengunobhala jikelele we-NFP, nokuyisikhundla aqokelwa kuso engqungqutheleni yokukhatha ubuholi eyayingo-2019.
Akazange ahlale ngokunethezeka kuleso skhundla ngenxa yombango wobuholi, njengoba ubuholi aqokwa nabo bahlakazwa yisinqumo senkantolo ngo-2021.
UMdlesthe uke wakhulumela umholi we-NFP ongasekho, uNkk Zanele kaMagwaza-Msibi, kanti phambilini wayekade eyintatheli.
Akusikhona okokuqala amalungu e-MK eshona engozini yemoto.
Kuwo lo nyaka kwashona amalungu e-MK ayisithupha ayebheke emcimbini wokubungaza usuku lokuzalwa likaNkk Sizakele MaKhumalo Zuma, owunkosikazi womholi we-MK, uMnuz Jacob Zuma.
La malungu e-MK ayesuka eMtshezi, asha angqongqa ngesikhathi itekisi ayeyigibele igingqika ngaseKranskop.
Naye uZuma uke wabandakanyeka engozini yemoto ngesikhathi kubhekwe okhethweni, kodwa akangalimala.