UVOTE usemanzini umndeni womholi weMK, uJacob Zuma, kushona owomndeni ngaphambi kokhetho lwangoLwesithathu.
Umfowabo kaZuma, uMnuz Joseph Ngekengithule Zuma, ushone ngoLwesibili.
UJoseph ushone esevotile, abomndeni bathe uvotele iMK.
UJoseph ubelokhu ephambili ekwesekeni uZuma ngesikhathi esakwi-ANC, nangesikhathi ebhekene nokuboshwa.
Uyena owayekhulumela umndeni enkonzweni eyayibizelwe ukuzokhulekela uZuma ngesikhathi edonsa isigwebo sezinyanga ezingu-15 ejele.
Abanye bakwaZuma bavote esikhungweni esisesikoleni iNtolwane Primary kanye noZuma, ngoLwesithathu.
UJoseph yena wavota ngokukhethekile ngoMsombuluko, ngaphambi kokuthi kumenele.
Okhethweni lwangoLwesithathu abomndeni wakwaZuma bebehlukene phakathi njengoba kukhona abavotele iMK, abanye bavotela i-ANC.
Umfowabo kaZuma, uMnuz Khanya Zuma, uthe uJoseph ungakulabo abavotele iMK.
“Selokhu kwathi nhlo silandela umfowethu (uZuma). Ubengeke (uJoseph) ahlukane nomfowethu. Njengoba nami nje ungibona, ngiyabagwaza. Kusukela siseyizingane, besilokhu silandela umfowethu (Zuma) ngoba thina asimandla kakhulu ezintweni ezithinta ipolitiki. Ngiyazi ukuthi umfowethu (uJoseph) wavotela uMkhonto.”
Yize uKhanya ethe uJoseph ubengathandi ukuzibandakanya nezinto zepolitiki, nokho ubengasabi ukuphawula ngezinto ezingamphethe kahle kwi-ANC.
Ngesikhathi uZuma ekhishwa kwesobumengameli ngo-2018, uJoseph waphumela obala, wagxeka ubuholi be-ANC.
Wasola ubuholi be-ANC ngokusebenzisana namaqembu aphikisayo ukuketula uZuma.
Nangesikhathi uZuma eboshwa, uJoseph wayeyingxenye yabantu ababephikisana nokuboshwa kwakhe.
Ekhuluma enkonzweni eyayingo-2021, wathi ukuboshwa kukaZuma kwazwisa umndeni ubuhlungu.
UKhanya uthe bese kunesikhathi eside uJoseph egula.
“Kugcine-ke kumthatha. Kusizwise ubuhlungu ukuhamba kwakhe. Besinethemba lokuthi uzosinda kule nto ebimphethe.”
UKhanya uchaze uJoseph njengemvu yenkosi.
“Umuntu obezilungele. Selokhu azalwa, uzilungele. Bona bangaphambi kwami, kodwa ubungaze udideke, uzitshele ukuthi imina engimdala ngoba yena ubezithulela. Ubewumuntu obezithandela inkonzo kakhulu. Ubesonta eyiNazaretha, futhi enesikhundla ebandleni.”
UKhanya uthe uJoseph uzofihlwa kuyo le mpelasonto.
AbeMK badlulise amazwi enduduzo emndenini wakwaZuma.
“Ubuholi beMK kuzwelonke budlulisa amazwi enduduzo emndenini kaZuma. Sengathi umphefumulo kaJoseph ungalala ngokuthula.”