INKANTOLO yabasebenzi isikhiphe isinqumo sokuthi bonke abasebenzi abangaphansi kwenyunyana yabasebenzi iNehawu abatelekile, babuyele emsebenzini engakapheli amahora angu-72.
INehawu ibiphonsele inselelo uMnyango wezeMpilo ngencwadi yenkantolo evimbela abasebenzi bezempilo ukuthi bateleke, uthi umsebenzi wezempilo ungeminye yemisebenzi ebucayi abangavumelekile ukuthi bateleke obuyithole ngeledlule.
NgoLwesihlanu, inkantolo yabasebenzi ilalele lolu daba yase isigodla isinqumo, yasikhipha namhlanje.
Abasebenzi bezempilo kusukela ekuseni bebesaqhubeka nokubhikisha ngaphandle kwezikhungo zezempilo bethi balinde isinqumo.
Izifundazwe uMnyango othole kuzo izincwadi zasenkantolo eziyisivimbelo, iKwaZulu-Natal, iGauteng, iNorthern Cape ne-Eastern Cape.
Ngeledlule kwezinye izikhungo imibhikisho ibinodlame kuvinjelwa iziguli ukuthi zingene ngaphakathi nabanye abasebenzi abebengekho esitelekeni, okuholele ekutheni kuphazamiseke ukusebenza kwezinye izikhungo.
INehawu ifuna ukunyuselwa umholo ngo-10% nomhlomulo wokuthenga umuzi ongu-R2 500, umqashi ubeke etafuleni u-4.7%.
INehawu nezinye izinyunyana ezijoyine isiteleka zithi umqashi ubukela phansi abasebenzi ngalesi siphakamiso ngoba u.4.2% umqashi ubethe uwukhipha ngesihle.