AYIKAZIWA imbangela yengozi yebhasi ebelihamba emgwaqweni uCanehaven Drive okuthiwa liphaphalaze layobhajwa ngodonga lwendlu, eCaneside, ePhoenix izolo ekuseni.
Okhulumela inkampani yonogada i-Reaction Unit South Africa (RUSA) uMnuz Prem Balram, uthe kulesi sigameko abekho abalimalile.
“Onogada bafike kule ndawo ekuseni bathola ukuthi leli bhasi liqale ngokubhodloza uthango olubiyile ngaphambi kokuthi liyobhajwa phambi kwendlu. Leli bhasi bekukhona kulo umshayeli kuphela, umnikazi womuzi engaphakathi endlini kodwa akulimalanga muntu,” kusho uBalram.
Uthe imininingwane ngokuholele kule ngozi ayikaziwa.
Okhulumela amaphoyisa KwaZulu-Natal uColonel Thembeka Mbele uthe bawutholile umbiko ngalesi sigameko.