UNOBHALA Jikelele we-ANC, uMnuz Fikile Mbalula, usedwebe umugqa obomvu kwabangeke bawuhloniphe umthetho i-Basic Education Laws Amendment (Bela).
Inkulumo kaMbalula ilandela isitatimende sikaMengameli Cyril Ramaphosa othe akuqale ukusebenza kwe-Bela njengoba injalo.
UMbalula ugcizelele ukuthi noma ngubani ozokhuluma okanye enze into ephambene nokusebenza komthetho uzothathelwa izinyathelo.
“Ngisho enhlanganweni yethu kuke kwavela ukukhuluma okugxeka i-Bela Act, ngakho noma ngubani ozophambana nokusetshenziswa kwalo mthetho ngokuphelele njengoba sekugunyaze umengameli, sizobhekana naye.
“Kungani abanye bekhuluma emakhoneni sengathi kunokungabaza ngobuholi bezwe ne-ANC? Akulungile lokho. Lokhu ngokwabantu abathanda ukubukwa, kuphikisana nenqubo ye-ANC, ngakho sizobhekana nabo,” kusho uMbalula ebalula ukuthi ukungabaza okunjalo ngaphakathi kwe-ANC akwamukelekile.
Uqhube ngokuthi kuyaphuthuma ukuthi kusetshenziswe umthetho i-Bela unjengoba unjalo.
Uthe ulindele ukuthi abantu be-ANC bathembe ubuholi bukaRamaphosa ikakhulu ezintweni ezithinta uguquko nokuthuthukiswa kwezemfundo.
Ukusayinwa kwe-Bela kunyakazise ubudlelwano be-ANC ne-DA kuhulumeni wokubambisana. I-DA isike yahola imibhikisho ekhala ngalo mthetho.
UNgqongqoshe wezeMfundo eyisiSekelo, uNksz Siviwe Gwarube, uzibophezele ukuthi uzoqala izinhlelo zokuthi i-Bela isebenze ngokugcwele. Uthe uzokwethula imigomo ezohambisana nomthetho ngokushesha.
Izigatshana ezibangwayo kulo mthetho zimayelana nokuthi amandla okunquma ulimi okuzofundwa ngalo nokuthi isikole sesigcwele yini, kulale kwinhloko yomnyango, hhayi esigungwini esilawula isikole.