UKUNTULEKA kwamathuba omsebenzi eNingizimu Afrika kwenze nezinkampani zaba namasu nezisombululo ezizolekelela ukuthuthukisa izimboni ezikhiqiza imisebenzi.
Inkampani i-2UFOODS iqophe umlando yethula inkampani yayo eHowick ngaseMgungundlovu nezovula amathuba emisebenzi abalelwa ku-175 kulandela ukutshalwa kwezigidi ezibalelwa kuR300 million.
I-2UFOODS yinkampani eyasungulwa nguMnuz Kholofelo Maponya nenkosi esikhotheme, uMnuz Sipho Mahlangu ngo-2016. Inhloso enkulu yale nkampani wukusimamisa umnotho ezindaweni zasemakhaya eNingizimu Afrika.
I-2UFOODS isayinde isivumelwano sokusebenzisana nebhange iThala, ubuholi boMdabu okubalwa neKing Misuzulu Foundation nenhlangano yokuthuthukisa izimboni, i-Industrial Development Finance Corporation.
UMnuz Thulasizwe Mthimkhulu wezokuxhumana kwi-2UFOODS, uthe akuzogcina ngalesi sivumelwano kuphela kodwa bazovula uxhaxha lwezitolo ezifundazweni ezahlukene ukuqinisekisa ukuthi umnotho uyasimama nasezindaweni zabamnyama okubalwa emakhaya nasemalokishini.
"Eminyakeni emithathu sihlose ukusungula amathuba emisebenzi awu-3500 sisebenzisa uR500 million ezimbonini zokusebenzela. Uma seyiyonke imali ezotshalwa phakathi kwe-2UFOODS nezitolo izoqala kuR2 million isitolo ngasinye nokuzokwenza ibe wuR700 million ezotshalwa ngezitolo," kuchaza uMthimkhulu.
Akuzogcina ngale misebenzi ebaliwe kodwa abalelwa naku-200 amanye amathuba azovela ngokusebenza ngokubambisana nezinye izimboni. Kuleli sonto iSilo uMisuzulu kaZwelithini, sihambele lo mcimbi kanjalo neMeya kaMasipala Umngeni, uMnuz Chris Pappas nezinhlaka ezahlukene zamabhizinisi.
UPappas uveze ukuthi lezi zindaba ziyabathokozisa kakhulu kwazise zizothuthukisa indawo ngesikhathi abantu bewudinga kakhulu umsebenzi.
"Siyakuthakasela kakhulu lokhu njengomkhandlu waseMngeni nokuthi abatshali zimali basibone njengendawo yokuzotshala kuyo. Sithi amasango siwawulile eMngeni kubona bonke abatshali zimali," kusho uPappas.
Lezi zindaba zizijabulise kakhulu izakhamizi zaseMgungundlovu wonkana njengoba ezinye zazo zibonakale ziphawula ekhasini lalo Masipala ku-facebook.
"Saze sajabula siyizakhamizi zaseMngeni ngezindaba ezimnandi. Sibonge kuMdlokombane nemeya yethu ngokusebenza ngokuzikhandla," kusho uMadanone Dnn.
"Baze bajabula abantu baseMngeni, siyababongela," kusho uClie Mahlaba.