UWOTHA ubomvu umndeni kasomabhizinisi ongasekho emhlabeni, owayeshade nonina kasaziwayo ongumethuli wohlelo olusha.
Umndeni kaMnuz Elliot Magubane, owashona ngo-2017, ukhala ngo-Andile Ncube nonina ukuthi bagweve namafa.
U-Andile ukwiYoung, Famous and African okuwuhlelo olukhuluma ngobukhazikhazi bempilo yosaziwayo bakuleli nolukhonjiswa kwiNetflix.
U-Andile ushiye abalandeli bebambe ongezansi ngenxa yezinga elicokeme lempilo ayiphilayo. Kuthiwa yena, nonina baphuca izingane zikaMagubane, izimpahla zikamufi okubalwa imizi, izimoto eziyisikhombisa nezinkampani zikamufi eziyisihlanu.
USphamandla Magubane (27) oyindodana kamufi, uthe okubacasule kakhulu yindelelo ka-Andile, obe nesibindi sokuthatha isinqumo sokuyoqopha ithuna likayise ekubeni engazange axoxisane nabo njengomndeni.
Okunye okubaphule umoya ukutetemuka kuka-Andile ngeRange Rover, okungekayise kaSphamandla, waphinde wabonakala ngayo esiqeshini sangesonto eledlule.
"Ayikho into ebuhlungu njengalento eyenziwa ngu-Andile. Sisakhathazwe umbango wamafa ngoba unina wakhe ugweve nezinye zezinto obekungamele zithathwe. Kumanje kunecala lenkohlakalo eliphethwe ngoKlebe kodwa ngeke ngande kakhulu ngalo. Angiqondi ukuthi ngempela kungani u-Andile ebenesibindi esingaka sokukhohlisa abantu ngemoto okungeyona neyakhe," kusho uSphamandla.
Eqhuba uthe kuningi abebekufihlile okukhomba ukuthi u-Andile nonina wakhe baphezu kobuqibili obuthize. Ngokwemibiko unina ka-Andile washada noMagubane ngo-2009.
"Incwadi yamafa eyabhalwa ngubaba ikubeka kucace ukuthi unkosikazi wakhe unikwa u5%, bese kuthi thina zingane zakhe azizalayo sithole u95% wamafa.
Okubuhlungu ukuthi akabanga neqiniso unkosikazi owayeshade nobaba. Sivalelwe kuzo zonke izinto zikababa. Sixakekile nezingane zakithi ekubeni ubaba wayenza incwadi yamafa akhe. Ukuthi bafinyelela kanjani kuzo zonke izimpahla obekungakavumeleki ukuthi bazithathele zona, nathi asazi," kuchaza indodana kaMagubane.
Eqhuba uthe, ngemuva kokuthi unina ka- Andile abavalele emzini wakubo oseBlue Gill Estate ngo-2018, izinto zaqala ukubhimba ngobudlelwano babo ngoba abakuvumelanga ukugetshengwa izimpahla zikayise, okumele bahlukaniselane zona.
Phakathi kwezimpahla zikaMagubane ezibangwayo, kubalwa izimoto eziyisikhombisa, iVenter Elite, AmaLand Rover amabili, Mazda 2, BMW i7 series namaDatsui Go amabili. Imizi yakhe okubikwa ukuthi mithathu isiyonke, iseBirchleigh North, Birch Acres naseBlue Gill Estate yonke iseGauteng
Ethintwa yintatheli, u-Andile uluvalile ucingo lwakhe, maqede wathumela umyalezo ethi makathunyelwe i-SMS.
Kuze kwaphela isonto imiyalezo athunyelelwe wona nge-SMS nangeWhatsApp engayiphenduli.