AMALUNGU aseNdlunkulu afake udaba lombango wefa leSilo enkantolo, athi agabe ngobufakazi obuqanda ikhanda obeseka isicelo sawo. Isolezwe linamaphepha afakwe eNkantolo eNkulu eMgungundlovu, aweneka wonke umsuka wombango wefa leSilo uZwelithini kaBhekuzulu osanda kukhothama walandelwa wuNdlunkulu uMantfombi MaDlamini Zulu. Amaphepha ahlukene kabili awokuqala aveza eqhulwini uMntwana uNtandoyenkosi Zulu noMntwana uNtombizosuthu Zulu-Duma. UMntwana uNtandoyenkosi emaphepheni uzethula njengendodakazi kaNdlunkulu uSibongile Winnifred Zulu waKwaKhethomthandayo nokunguyena omdala ngokokugana iSilo. Amazinyane emaphepheni athi unina wagcagcela iSilo ngoDisemba 1969 futhi bashada umshado ohlanganisa amafa ngaphansi komthetho i-Marriage Act no.25 of 1961. Lo mshado yiwona abagabe ngawo ukuthi ugunyaza unina ukuba athole amafa. Amazinyane athi okuwasukumise phansi wukuthi indlela yokusayina kukayise sengathi yakokotelwa. “ Sixhumane nongoti wombhalo wesandla oqhathanise ukusayina kukababa okusebhukwini elikhuluma ngomgubho wobukhosi bukaZulu. Okunye ukusayina yilokhu okusebhodleleni lewayini iBayede Wine. Ungoti uqhathanise ukusayina encwadini yefa likababa kwacaca ukuthi akufani nalokhu kwefa futhi ukhona umbiko wakhe,’’ kusho umbhalo emaphepheni enkantolo. Elinye iphuzu elivelayo emaphepheni lithi inombolo kamazisi womuntu okuthiwa kufanele athathe isihlalo ovela ngegama lika S. M Zulu sengathi inogcobho ibukeka ishintshiwe. Abamangalelwa amzinyane emaphepheni wuNdlunkulu Buhle kaMathe, wuNdlunkulu MaDlamini okhotheme, wuNdlunkulu Thandekile Jane Ndlovu, wuNdlunkulu Nompumelelo KaMchiza. Kuphinde kuvele negama likaMnuz Jerome Ngwenya, yiSanlam Trust, wuNdunankulu waKwaZulu-Natal kodwa akagagulwanga ngegama. Kukhona negama lenkantolo (Master of High Court) eMgungundlovu. Amaphepha esibili afakwe wuNdlunkulu waKwaKhethomthandayo uMaDlamini, unina wamazinyane afake amaphepha okuqala. UNdlunkulu umangalela uhide lwabantu abangu-19 abasohlwini lwamaphepha amazinyane kanti kwehluke ngokuthi yena ufake uMntwana uThembi Ndlovu, uMntwana uMbonisi Zulu, uMntwana Thulani Zulu, uMntwana Lindi Zulu, uMntwana Vulindlela Zulu, uMntwana Mxolisi Zulu, uMntwana Mathuba Zulu, Mavis Zungu, noMengameli wezwe kodwa akagagulwanga ngegama. Abamangali bacela inkantolo ukuthi ilubeke eqhulwini udaba ngoba luyaphuthuma futhi amehlo esizwe athe njo kulona afuna isiphetho.
