Page lead
AKUCACI ngeyokuphasiswa kwesabelomali sezwe ePhalamende kuleli sonto njengoba i-DA imile ekutheni akukho sabelomali saphasiswa ngaphandle kwaleli qembu, ekubeni i-ANC ithi yonke into isimi ngomumo nakanjani sizophasiswa.
I-DA ishaya phansi ngonyawo ithi ngeke siphasiswe isabelomali esinyusa iVAT kuleli, esathulwa nguNgqongqoshe wezeziMali, uMnuz Enoch Godongwana.
Abaholi abaphezulu be-ANC okubalwa uMengameli Cyril Ramaphosa noNobhala Jikelele, uMnuz Fikile Mbalula, banethemba lokuthi sizophasiswa isabelomali uma sekuhleli iPhalamende ngoLwesithathu.
Okhulumela i-ANC, uNkk Mahlengi Bhengu-Motsiri, utshele abezindaba izolo, njengoba bekusongwa umhlangano wesigungu esiphezulu sale nhlangano eGoli, ukuthi ibhungwe kabanzi eyokuphasiswa kwesabelomali.
Uthe akafuni ukwanda kakhulu ngoba le ndaba ifana nekhasi elizovalwa.
"Sinethemba lokuthi isabelomali sizophasiswa yiPhalamende. Lolu daba luxoxwe kakhulu ngoMgqibelo emhlanganweni," usho kanje.
UGodongwana waphakamisa ukunyusa iVAT ngo-0.5% ngenxa yezinselelo ezibhekene nezwe.
Okhulumela i-DA, uMnuz Willie Aucamp, uthe i-ANC kumele yazi ukuthi akukho mnyakazo ongenzeka ngaphandle kwe-DA kuhulumeni wokubambisana.
"Siyiqembu lesibili ngobukhulu kuhulumeni wokubambisana kwamaqembu, ngakho akukho okungenzeka ngaphandle kwevoti le-DA. Ngeke siphase isabelomali esinyusa iVAT kuleli," usho kanje.
Uthe bangavumelana nokuphasiswa kwesabelomali esinyusa iVAT ngo-0.5%, uma kungukuthi kuzoba yinto yesikhashana futhi kuphinde kwehliswe intela.
"Ngesikhathi singena kuhulumeni wokubambisana sazitshela ukuthi sizokwenza izinto ezizokhulisa umnotho, sakhe namathuba emisebenzi. Lukhona uhlu lwezinto esaziphakamisa kwi-ANC, ezichithe zonke," usho kanje.
Uveze nokuthi i-ANC ibatshele ukuthi izolanda namanye amaqembu angekho kuhulumeni wokubambisana, isebenzisane nawo ukuze kuphasiswe isabelomali. Amanye ala maqembu uthe i-EFF.
I-EFF yathi izimisele ukuxoxa ne-ANC kodwa uma ingekho i-DA ne-FF Plus kuhulumeni wokubambisana.
U-Aucamp uthe bazohlangana namhlanje bakhiphe umkhombandlela ngabazokwenza ngesabelomali.
I-ANC idinga ukwesekwa amanye amaqembu ukuze kuphasiswe isabelomali njengoba ingasakwazi ukuzithathela izinqumo iyodwa kulandela ukwehlelwa ukwesekwa emva kokungenzi kahle okhethweni.