UMETHULI wohlelo lwesithembu uMnakwethu, ophinde abe nohlelo olumayelana nempilo yakhe uThando Nesithembu, uwachoma uphaphe lwegwalagwala amakhosikazi akhe.
UMusa Mseleku oshadelwe amakhosikazi amane okubalwa kuwo uBusisiwe MaCele, Nokukhanya MaYeni, Thobile MaKhumalo noMbali MaNgwabe udalule ukuthi ngaphandle kwamakhosikazi akhe, lwalungeke lube khona uThando Nesithembu futhi lube nempumelelo.
"Ngiyabonga bafowethu, nibalulekile kakhulu ngethembele kunina," kubhala uMseleku.
UThando Nesithembu oluzokhonjiswa kuMzansi Magic ngo-8 ebusuku namhlanje, lungezinye zezinhlelo ezithandwa kakhulu. Yize lumayelana nempilo kaMseleku nakhosikazi akhe kodwa luphinde lufundise abantu ngempilo yesithembu.
AboMzansi Magic banameke emakhasini abo ezinkundleni zokuxhumana bekhumbuza abantu ngohlelo. Abalandeli bathi sebejahe kuhlwe balubukele uhlelo.
"Angisakwazi nokulinda, sithembe nokuhamba kukagesi kuzosixolela," kusho uLebitso Mahlako.
"Kumele lenziwe libe ihora ukuze lungasheshe luphele ngemizuzu ewu-30," kusho uLiako Ramorakane.