IMINYAKA iyafika, iphinde yedlule. Kodwa u-2024 kwabezenkolo uwunyaka lapho begqemeke khona ingozi okuzothatha isikhathi ukuthi iphole.
Kube unyaka onezinyembezi, washiya ubuhlungu kanye nenkumbulo ngokudlula emhlabeni kwengqalabutho ebidume kakhulu kwezenkolo uNkk Zanele Mbokazi- Nkambule obeyibambe kuKhozi FM.
Abaningi bazomkhumbula ngohlelo lwakhe lwezenkolo Eshilo, abelusakaza ngesonto oKhozini. Ubeshumayela ivangeli lokukholwa, uthando kanye nokumazisa uNkulunkulu kukhona konke umuntu asuke ekwenza.
Nakuba kusaneminjunju ngokudlula kukaZanele, ukushona kwamalungu angu-45 aseZCC engozini yebhasi elibangise eMoria ngephasika nokudlula emhlabeni kukaMfundisi wakwaShembe uMzwenkosi Ephraim Gcwensa kodwa inkonzo ebihlanganise amabandla ehlukene eFNB Stadium eGoli muva nje, itshengise ubumbano, yaphinde yanikeza ithemba lokuthi nasebumnyameni uNkulunkulu ukhona.
Le nkonzo ebiyesekwe iMotsepe Foundation iqinise idolo lokuthi onyakeni ozothwasa izwe laNingizimu Afrika elikhungethwe ubumnyama, lizoba nokukhanya kulona.
