Incwadi: Bare V: Curtain Call
Ibhalwe: nguJackie Phamotse
Ishicilelwa yi: Phamotse & Company LTD
UKUTHUNJWA nokudlwengulwa kwezingane bese zigxishwa izidakamizwa, ziyodayiswa kwamanye amazwe ngesinye sezihloko ezihlokolozwa ngumbhali, uJackie Phamotse.
Yize iBare V: Curtain Call, kuyinoveli kepha indikimba isuselwe ezehlakalweni eziningi ezenzeka nsuku zonke eNingizimu Afrika. Phakathi kwezihloko abhala ngazo uJackie, ubalula umsuka wenkohlakalo yosopolitiki ngokubambisana nosomabhizinisi abafuna ukuceba nanganoma iyiphi indlela.
Ulandisa ngokuthunjwa kwamantombazane nabafana abasukela eminyakeni emibilin ubudala, balungiswe ukuze badayiselwe izigilamkhuba zosopolitiki.
Weneka ukudayiswa nokusetshenziswa kwezidakamizwa budedengu ezindaweni zomta kabani eGoli. Kusemqoka ukuthi singakhohlwa yimibiko yabezindaba evamise ukudalula ukuthunjwa nokunyamalala kwezingane kepha abomthetho bahudule izinyawo.
Umlobi weneka ukungcola nokugcwaneka kwezigebengu ezweni, okubalwa osopolitiki nosomabhizinisi bazo zonke izinhlanga. Yize kuyinoveli kepha iqhakambisa inkohlakalo esiyibonayo ezweni futhi kunemicikilisho esencwadini kepha engadalulwa ngabezindaba.
Ngo-Okthoba 23, isiteshi sethelevishini esethula izindaba i-eNCA, sibike ukuthi amaphoyisa omgwaqo athole abantu abebethunjwe bavalelwa endlini thizeni eGoli. Kusobala ukuthi kayinuki ingosiwe.
Ungazithola ezinye izincwadi kwabase-Exclusive Books https://www.exclusivebooks.co.za