Incwadi i-Corrupted: A Study of Chronic Dysfunction in South African Universities, ibhalwe nguJonathan D Jansen, yashicilelwa yiWits Universal Press.
KUYAZIWA ukuthi uSolwazi uJonathan Jansen, akananazi uma eveza ilaka lakhe. Wenze kanjalo encwadini ethi, Corrupted: A Study of Chronic Dysfunction in South African Universities, lapho egxeka ukuphathwa nokuhlelwa kwemfundo emanyuvesi aseNingizimu Afrika.
Ulihlaba alihlikize izinga lemfundo emanyuvesi akuleli, ukuhlinzekela izitshudeni ngemfundo nezinsiza ezifanele, ukukhetha iphela emasini uma kuxhaswa izitshudeni ngemifundaze, ukuxhashazwa kwemali nokugxambukela kosopolitiki.
Mayelana nokugxambukela kwabaholi bezepolitiki, uJansen udalula ukuthi kwake kwaphakanyiswa ukuthi ivalwe iNyuvesi i-Unitra, ukuze kongiwe imali futhi kuthuthukiswe iNyuvesi yaseCape Town (UCT) ngoba yayinezinsiza ezisezingeni elifanele.
"Kwathi uma ungqongqoshe wezeMfundo uDkt Asmal, ekhipha umyalelo wokuthi zingathathwa izitshudeni ezizofunda unyaka wokuqala enyuvesi, okuyisinyathelo sokuqala sokuvala isikhungo, kwangenelela uMandela.
“Nguye owashaya phansi ngonyawo, wathi asimiswe isinqumo sokuvala i-Unitra. Wathi uMandela “uma ungasishintshi isinqumo, mina uqobo lwami ngizohola imashi eya eMthatha”. Waphoqeleka u-Asmal ukuthi ashintshe isinqumo. Saphoxeka, Saphoxeka," kubhala uJansen ekhasini 200.
Akalona ivukana uJansen kwezemfundo nezepolitiki futhi kayingabazeki imibono neziphakamiso azenza encwadini.
Ziningi ezinye izincwadi ongazithola kwabase-Exclusive Books https://www.exclusivebooks.co.za
