UMHLAZIYI: Mpume Nzimande
UKUQHUMISA usomahlaya ngolabhabha phambi kwezihlwele, kwaveza esinye isithombe ngoWill Smith, umnyeni kaJada Pinkett Smith.
Encwadini ethi Worthy, ebhalwe nguJada, kuhlaluka okuningi ngezinselelo ababhekene nazo emshadweni wabo.
Umlingisi ugonyuluka ngezinto eziningi, okubalwa nothando lwakhe noTupac, umrepha owadutshulwa ngoSepthemba ka-1996, engakahlangani noWill.
Kuyindida ukuthi uTupac, wake wacela ukushada noJada ngoba uyaphika ukuthi bake bathandana. UJada udalula isinqumo abasenza noWill ngo-2016, sokuthi bahlale ngokwehlukana kepha abahlukanisile umshado, kuze kube yimanje.
Umlingisi uthi kunesikhathi lapho uRock wacela ukuthi bashawe wumoya kepha wenqaba uJada, washo ukuthi akadivosile noWill kodwa waliqoma ibhobhedleyana lomculi futhi bajola iminyaka emibili.
Sekuyindaba endala ukuthi inkakha kwezamahlaya uChris Rock, yasala ihleka inhlinini ngemva kokudatshulwa ngempama nguWilll emcimbini wezindondo, i-Oscars, ngo-2022.
Lesi senzo singezinye sezisathu ezidale ukuthi uJada agonyuluke ngempilo yakhe noWill nezingane zabo
Ubeka kanje uJada ekhasini 393:"Sekuneminyaka uChris ehlekisa ngathi sinoWill. Kangangokuthi, vele besesazi ukuthi kuyingxenye yomkhakha wethu."
Umlingisi uthi wagxekwa kakhulu ngabantu ngokuthi wasuke wamnyonkoloza ngamehlo amabi uChris ngesikhathi ehlekisa ngembungculu yakhe, bathi yingakho uWill abona kufanele ukuthi amvikele, wavele wamqhumisa ngempama usomahlaya, basala bekhungathekile abantu kuma-Oscars.
UJada uyaphika ukuthi isenzo sakhe sadala ukuthi uWill ashaye usomahlaya uma ehlekisa ngembungcula yakhe.
"Yayibuhlungu inhliziyo ngenxa yokuthi baningi abazenyezayo ngalesi simo. Kunezingane ezigcina zizibulala ngenxa yokwenziwa inhlekisa emakilasini ngabanye abafundi. ... Kwangiphula umoya. Angiphathekanga kabi ngoba kuqondiswe kimina. Ngaphatheka kabi ngoba wayehlekisa ngesifo sokulahlekelwa yizinwele (alopecia) esiphethe abantu abaningi," kubhala uJada, oseneminyaka engaphezulu kuka-26 eshade noWill.
Udalula nodaba lokuqomana nebhobhedleyana elingumculi, okwaphoqa ukuthi baludingide ohlelweni lwakhe iRed Table Talk.
Kepha namanje basahlala ngakwehlukana noWill futhi abahlukanisile. Ungabuzi mina thenga incwadi.
Zitholele ezinye izincwadi kwa-Exclusive Books https://www.exclusivebooks.co.za/
