INCWADI: Who will rule South Africa: the demise of the ANC and the rise of a new democracy?
Ababhali: Adriaan Basson noQaanitah Hunter
Abashicileli: Flyleaf Publishing
KUPHELA ukwazana uma sekunje ngoba wonke umuntu uzibona efanelwe ukuhola iNingizimu Afrika. Kusobala ukuthi wonke amaqembu ezepolitiki afuna ukuhlomula okhethweni. Kunemibuzo ephusile futhi ephendulwa yizintatheli ezimnkatshubomvu okungu-Adriaan Basson, noQaanitah Hunter, encwadini ethi Who will rule South Africa: the demise of the ANC and the rise of a new democracy?
Kukhona omafikizolo bamaqembu abangenamlando otheni ngaphandle kokuthi abasunguli bawo sebecikekile ukuholwa wuKhongolose. Kanti bakhona abanolwazi oluthuthukile kwezombusazwe nabanamagwevu kwezokuphatha. Kepha umbuzo uthi ngabe abavoti bakuleli banalo lonke ulwazi ngalawa maqembu?
Ngokolwazi olushicilelwe kwisizindalwazi se-IEC, kumanje awu-1753 amaqembu abhalisiwe kanti awu-357 kuzwelonke bese eba wu-1396 ezingeni lohulumeni basekhaya. Kusobala ukuthi kuzoshiyana ukwenza kwabezepolitki bezama ukweshela abavoti.
Ngokusho kwababhali, kukhona amaqembu angomafikizolo asanda kusungulwa azitshela ukuthi angase adle unhlanganiso wokuhola izwe. Phakathi kwawo kubalwa i-ActionSA, Rise Mzansi, uMkhonto weSizwe, Bosa nalabo abazimele ngabodwa njengoMmusi Maimane, weBuild One SA.
Kumele abezepolitiki bangamthathi kancane umholi weRise Mzansi, uSongezo Zibi ngoba unesipiliyoni kwezombusazwe. Kasazi ukuthi uMkhonto weSizwe uphetheni.
Kunomkhuba omusha wokuhola ngokuhlanganyela obonakala ezingeni lomasipala kepha le mishado yamaqembu ezepolitiki ivamisile ukubhidlika.
Okuseqhulwini encwadini wukuthi ngabe abantu baseNingizimu Afrika sebeqeqesheke ngokwanele ukuthi bayakwazi ukubona umholi weqembu ongumbhombayi noma cha? Kuyaziwa ukuthi uma intombi inezesheli eziningi, wonke umuntu usuke ebheke ukuthi izoqoma yiphi insizwa. Kuthiwa siyobona nyoni zowadla!
Nanka amehlo sibhekile ukuthi ngubani ozohola izwe.
Yiliphi iqembu lepolitiki elizodla umhlanganiso ngo-2024? Ngabe sizoholwa ngamaqembu ahlanganyele noma kuzonqoba uKhongolose futhi?
Zitholele ezinye izincwadi kwa-Exclusive Books https://www.exclusivebooks.co.za/