MININGI imigilingwane egilwa ngabantu abasha ngenxa yokungalutholi uthando lwabazali. Le migilingwane iqukethwe yinoveli ethi The first stone, ebhalwe nguCathy Donald, yashicilelwa yiKwarts Publishers.
MININGI imigilingwane egilwa ngabantu abasha ngenxa yokungalutholi uthando lwabazali. Le migilingwane iqukethwe yinoveli ethi The first stone, ebhalwe nguCathy Donald, yashicilelwa yiKwarts Publishers.
AbakwaBlue Weaver, bebambisene neHelco Promotions, bagabisa ngenoveli entsha eyethulwe ngoSepthemba. Ixoxa ngezinselelo ezibhekene nabantu abasha, njengezidakamizwa, ukunganakekelwa ngabazali, nokuhamba nabangani ababi.
Intombazane eneminyaka ewu-15, ebizo layo linguCharlie, ihlangabezana nembibizane ngesikhathi izithokozisa ephathini nabangani bayo futhi bebhema nensangu.
Kuthi besazijabulisa ephathini uCharlie nabangani bakhe, kuthushuke amaphoyisa ezokhuza umsindo. Kusuke umfana thizeni, afake izidakamizwa esikhwameni sikaCharlie sesikole, kube wukuboshwa kwakhe.
Ngenxa yokuthi le ntombazane ineminyaka ewu-15, ayiphoswanga ejele. Imantshi yanquma ukuthi idonse isigwebo ngaphansi kweso elibukhali likaninakhulu omncane, uSophie.
Akabhedelwa uSophie futhi ubheka ngisho isikhathi uCharlie asichitha endlini encane.
Phela uBonnie, unina kaCharlie, akanaso isikhathi sokunakekela indodakazi yakhe, ugade isoka lakhe.
Kuthe uCharlie esehlala noSophie, wafikelwa wumzwangedwa kanti uzohlangana noBilly, noMartha! Yaqala inkathazo. Yize uMartha, emdala kunoCharlie kepha uphethwe wusizi lwakhe lokushaywa yindoda ekubeni ekhulelwe.
Olunye utavatava lwempilo yokulahlekelwa yithemba ngekusasa eliqhakazile.
Ukukhubeka kwezingane zamantombazane kuvusa ubuhlungu. Inkinga wukuthi ezinye zifuna uthando ebantwini bangaphandle abangewona umndeni, bese ziyafathuza, kushabalale ikusasa lazo.
Kunezingane ezigcina zibhadla emajele ngenxa yokuthi abazali abazinakekel,i bese zithola imfudumalo nothando kubangani bazo.
Umlobi uxwayisa ngabantu abajaha ukuthi behlulele izingane ekubeni bengazi ukuthi ziphila kanjani emakhaya.
UCathy, ungudokotela wezempilo kepha uthanda ukubhala futhi unamanoveli ayisihlanu. Ngonyaka odlule uhlonishwe ngendondo iMilan International Literary Award, ngenxa yekhono kwezokucikoza.
Ziningi ezinye izincwadi ongazithola kwabe-Exclusive Books https://www.exclusivebooks.co.za