ISIHLOKO SENCWADI:The covenant of water
UMBHALI: Abraham Verghese
ABASHICILELI: Grove Press UK
UMHLAZIYI: Mpume Nzimande
ITHOLAKALA: Exclusive Books
IFIKELWA wumunyu intombazane eneminyaka ewu-12, uma ikhumbula uyise njengoba iphoqwa ukuba ishade nendoda eneminyaka engu-40.
Uyise kaBig Ammachi owayengumfundisi, wayefunge wagomela ukuthi ngeke amshadise emncane. Ngenxa yokuthi uyise useshonile, uyise omncane umfunela umendo ngoba ukhala ngokuthi kumba eqolo ukumondla nonina.
The covenant of water, ebhalwe ngu-Abraham Verghese, yinoveli elandisa ngamasiko asendulo, izimfihlo zemindeni, ukwelashwa kwabantu ngezindlela ezehlukene nokunye.
Umbhali ujikeleza ngokomqondo ezintabeni nasemakhoneni aseParambil, eTravancore, eseningizimu ne-India. Umongo wencwadi ususelwa endaweni yaseKerala, e-India, ngezikhathi zika-1900 kuya ku-1977, lapho impilo yayilawulwa ngezindlela ezehlukene.
Yize kuyinoveli lena kepha uVerghese, ucaphune olunye ulwazi lwezigameko ezenzeka ngempela, njengokuqhuma kwebhomu eMadras, ngesikhathi kuhlasela abaseJapan.
Umlobi ulanda ngomkhokha omubi ohlasela ilungu elilodwa lomndeni njalo ngonyaka. Kuthi esekhulile umakoti, uBig-Ammachi, owashada emncane, azame ngokusemandleni ukufundisa umfana wakhe ukuthi aqikelele ukuze kugwemeke ukhondolo olubi, olubulala amalungu omndeni.
Yize umkhokha omubi kungowabasemzini kepha uBig Ammachi, uyazibophezela ekutheni athole isisombululo ukuze asize isizukulwane esizayo. Le ncwadi igqamisa ukuthi umkhokha wokuminza kwabomndeni wasemzini kaBig Ammachi, uyamphoqa ukuthi abhekane nemfihlo yabasemzini yize ingathinti yena.
Kuyacaca ukuthi kungani usozimali wase-USA futhi ongumnikazi wesiteshi sethelevishini, u-Oprah Winfrey, eyithanda incwadi waze wayifaka ekilabhini lokufunda izincwadi.
Ziningi ezinye izincwadi ongazithola kwabase-Exclusive Books https://www.exclusivebooks.co.za
.