INTATHELI YESOLEZWE
KWASUKA lokho! Isisombulukile inyanga yabesifazane lapho bezobonisana futhi bazithokozise. Le nyanga ka-Agasti, inikeza imbokodo ithuba lokucubungula izinselelo ezibhekene nabesifazane futhi igqugquzela ubumbano nokwakhana phakathi kwabo. Kuqhakanjiswa iqhaza labesifazane bezinhlanga ezehlukene ababhikisha, belwela amalungelo abamnyama ngo-Agasti 9,1956.
Yingakho abase-Exclucisve Books bebophele izincwadi ezehlukene ezinohlonze futhi ezihlwabusile nezizothakaselwa ngabaningi. Ezinye zibhalwe ngabesifazane kanti zikhona neziqhakambisa abalingisi besimame.
INCWADI ethi The Bookbinder of Jericho, ilotshwe nguPip Williams. Umbhali ucikoza ngomlando ogxile ezigamekweni ezenzeka empilweni yamantombazane ayizelamani, okunguPeggy noMaude. Incwadi iqubula imibuzo ngemfihlo yomndeni nokunye.
ISANGANISA abantu abaningi incwadi ka-Abraham Verghese ethi, The covenant of water. Indikimba igxile ezizukulwaneni ezintathu zomdeni ohlala eKerala. Umnyombo wayo usekucubunguleni umsuka nomthelela wemithi yokwelapha, nezenkolo. Isasasa lencwadi linanelwe nayingqalabutho kwezokusakaza futhi engusomabhizinisi wase-USA, u-Oprah Winfrey.
UKHIPHA unyawo umbhali ohlonishwayo emhlabeni uBryn Turnbull, ngenoveli ethi The Paris Deception. Umlobi uxoxa ngokuntshontshwa kwemidwebo yezobuciko ngamasosha angaphansi kweNazi. Yilapho abalingisi besifazane ababili bequnga isibindi, belwa ukuze babuyise amagugu esizwe antshontshwe ngabeNazi.
IVULEKA amehlo intokazi uma ithola ithuba lokufunda ngempilo nezinselelo zayo eNew York. Le ntokazi ekhuliswe ngokukhuselwa ngunina onolaka eNairobi, iyaphoqeleka ukuthi ikhule ngokushesha futhi izimele uma isibona indlela entsha yokuphila eNew York. Yilapho ibhekana nejoka lokuzifuna nokubhekisisa iziyalo nezimfundiso zikanina. Lena yinoveli ethi Lucky Girl, ibhalwe ngu-Irene Muchemi-Ndiritu.
NGEKE isale ngaphandle incwadi kaLouisa Zondo, unina womculi uRiky Rick, owazibulala ngo-2022. Encwadini iDearest MaRiky, umbhali ubhoboka ngomuzwa wokulahlekelwa yindodana nokuzama ukunakekela umndeni ngemva kwesehlo esishaqisayo. ULouisa uzama ukulwa nezinhlungu zokushonelwa ngokuthi abhale izincwanjana ezincane eziqondiswe kuRiky Rick, lapho egonyuluka ngezinto eziningi.
UMLOBI ukhinida zonke izigigaba ezazenziwa ngowesifazane owayebhekene necala lokubulala, elaqulwa ngo-1932. Umhlengikazi waphenduka usaziwayo ngesikhathi ebhekene namacala okubulala abomndeni ngokubadlisa uphoyizeni. I-Daisy de Melker: hiding among killers in the city of gold, ibhalwe nguTed Botha, ilandisa ngowesifazane owayethweswe amacala okubulala indodana yakhe, nabakhwenyana ababili (ngezikhathi ezehlukene) eGoli.
Sibhekene nezingqinamba eziningi empilweni ngakho kusemqoka ukuthi siphumuze imiqondo yethu ngokufunda izincwadi. Kusemqoka ukuthi owesifazane akaphume ekhaya, avakashele izitolo ezinjenge-Exclusive books, ayobheka izincwadi ezinolwazi oluphusile.
Lujulile futhi lusemqoka ulwazi oluthola ezincwadini. Kukhona ezikufundisa ngokupheka; ezikweluleka ngokuthi ungabhekana kanjani nezinselelo zempilo, ukuhlukumezeka emphefumulweni; ezothando, ezemfashini, nezamabhizinisi nezinye. Uzothola izinhlobo ezehlukene zezincwadi uma uvakasha kwa-Exclusive Books, www.exclusivebooks.co.za
