INCWADI: Battlefield earth: a saga of the year 3000
UMBHALI: Ron L Hubbard
ABASHICILELI: Galaxy Press
BAZOYITHOKOZELA abathandi bezincwadi eziqhakambisa isayensi, ezobuchwepheshe nemilingo inoveli entsha.
URon L Hubbard ucikoza ngemigilingwane encwadini ethi Battlefield earth. Umlobi ubhala ngokuphicaphica ngekusasa lesidalwa esingumuntu uma liqhathaniswa nezinye izidalwa eziphila komunye umhlaba (aliens).
Lapha ngikhuluma ngemicabango yabantu abangaphili njengathi (alien) futhi esingazi ukuthi bahlala kuphi kepha esicabanga ukuthi basuka emkhathini noma komunye umhlaba, uma ukhona.
Yize kuzwakala njengenganekwane kepha ikusasa alaziwa. UHubbard ukholelwa ekutheni thina esiphila manje, kungenzeka sishabalale futhi ikusasa lethu libe sengcupheni yokuhlaselwa yilaba abaphila ngendlela ehlukile kunathi lapha emhlabeni.
Okusemqoka ngale noveli ukuthi ikunikeza ithuba lokusabalala ngokomqondo nokuthi ucabangisise ngezinto ezingase zenzeke yize ungakholwa ukuthi zikhona futhi ziyenzeka kumanje. Okugqame kakhulu enovelini wukuthi imicabango yombhali kayilawulwa wukuthi siphila kanjani, ngasiphi isikhathi kepha igqugquzelwa yizinto ezenzakalayo kumanje ezingachazeki. Ngokombono kaHubbard, kusemqoka ukuthi sithole ulwazi ngazo futhi sizihlaziye ngokwenqubo yethu thina esiphila kulo mhlaba.
Ingqikithi yencwadi isukela onyakeni ka-3000 AD lapho isidalwa esingumuntu (mina nawe) silawula konke okuphila emhlabeni futhi singenelela nasemkhathini. Yilapho kutholakala izidalwa ezizibiza ngama-Psychlo, alinganiselwa ku-9 feet ngobude (2, 777 wamamitha) bawo. Omunye wama-Psychlo uphendula abantu izigqila ngokuthi abasebenise ezimayini bakhiqize igolide.
Esinye sezigqila nguJonnie Goodboy Tyler, siphuma emphakathini wabantu abangu-35000 abaphumelelayo ukuthi baphunyuke ezandleni zalezi zidilwa ezingaqondakali.
Uma udidekile ungazi ukuthi ngibhala ngani, cabanga amafilimu akhuluma ngemilingo, nemigilingwane yesayensi nezobuchwepheshe lapho kuqagulwa izigameko eziyokwenzeka eminyekani ewu-100 ezayo.
Yinoveli efundekayo futhi enamancoko engakwenza ufune ukwazi kakhulu ngemilingo nezinkulumo zokuthi bakhona abaphila ngendlela ehlukile kunathi thina, esiphila lapha emhlabeni.
Ungafunda kabanzi ngenoveli ngokubheka lapha www.battlefieldearth.com