INCWADI: Woman evolve
UMBHALI: Sarah Jakes-Roberts
ABASHICILELI: Thomas Nelson Publishers
U-SARAH Jakes Roberts ukhuthaza abesifazane asebephelelwe yithemba empilweni.
Usebenzisa abantu besifazane abaqalekiswa ngenxa yokuziphatha kabi kwabo kepha uSarah ukholwa wukuthi singafunda okukhulu kubona. Wenza isibonelo ngo-Eva, owesifazane ongafunwa ngumuntu futhi osolwa ngokudunga izizwe ngezizwe, ngesenzo sakhe saseNgadini yase-Edeni.
USarah ulandisa ngokuthi kulula ukuthi abantu bakhumbule okubi okwenziwa ngu-Eva, bathumthuke ngazo zonke izinhlamba ngenxa yephutha alenza e-Edeni.
Umbhali uxwayisa ngokuthi akumele sigxile ekutheni yikuphi okubi umuntu akwenzile kepha ekutheni yiliphi iphutha alenzile futhi singenze kanjani ukuthi sifunde kulona bese siyadlulisa.
Umbhali uthi baningi abantu abanquma ukungena ophuzweni ngenxa yokuthi benza amaphutha bese abantu bezenza izingelosi sengathi bona abawenzi amaphutha. Akasho ukuthi abantu abangajeziswa ngezenzo zobubi abazenzile kepha uthi kusemqoka ukushiya konke ezandleni zikaNkulunkulu.
Akulula ukuthethelela umuntu okwenze isilo sengubo kepha kusemqoka ukuthi uzame ukuqhubeka nempilo ngoba inzondo ngeke ikubuyisele ngalutho.
INCWADI: States of play: How Sportswashing Took Over Football
UMBHALI: Miguel Delaney
ABASHICILELI: Orion Publishing Group
UWUHLABA awuhlikize umlobi umkhuba owenziwa kwezemidlalo, yiziqumama, nezinhlangano, ngisho nohulumeni uqobo. Ugxeka umkhuba obizwa nge-sportswashing lapho kusetshenziswa ezemidlalo ngenhloso yokufihla inkohlakalo, nokungalawuleki kwezinto ngendlela efanele bese kufakwa imali ukuze abantu bangayiboni inkohlakalo.
Ukhala ngesenzo senkinsela yaseQatar nesikhulu seFifa ngokugxambukela kwezemidlalo ngesikhathi i-Argentina inqoba iNdebe yoMhlaba ka-2022, lapho uLionel Messi equbula indondo. Umbhali uthi kwakungafanele ukuthi bobabili basebenzise leli thuba ukuqhakambisa isiko lama-Arabhu.
Phela bamembathisa ibishit- uhlobo lwengubo egqokwa ngowesilisa futhi luyinkomba yokuhlonipha isiko labantu abahlala emazweni angama-Arab.Ukhononda ngokugxambukela kweziqumama zamaSulumane ezithenga amakilabhu ase-Europe, ukuze zikwazi ukungena kwezikanobhutshuzwayo zifike zidunge inqubo yomdlalo.
Ekhasini 102, ulandisa kabanzi ngakubiza ngokudayiswa keNdebe yoMhlaba. Ubalula ukunengeka kukaSepp Blatter ngemva kokuthi uPlatini eshintshe umqondo, wavotela ukuthi imidlalo yeNdebe yoMhlaba isingathwe eQatar kanti uBlatter wayefuna i-USA noma iRussia. Umbhali uthi usola ukuthi i-Qatar, yakhipha amantshontsho ukuze ikwazi ukuhlela imidlalo yeNdebe yoMhlaba ka-2022.
INCWADI: Playing Flirty
UMBHALI: Shameez Patel
ABASHICILELI: Little, Brown & Company
BUSENGCUPHENI ubuhlobo babangani uma sebekhohlwa wukuthi umdlalo, wumdlalo nje kwaphela. Asikho isidingo sokuthi baze bavovane inkani ngenxa yokuthi akekho ofuna ukugoba uphondo phakathi kwabo.
URose Marie Jones uvuma yize engathandisisi ukujoyina abangani bakhe uma kunomdlalo wamakhadi. Yinto ejwayelekile ukuthi yenzeke futhi akekho oxabana nomunye kepha uRose usenkingeni ngoba umphathi wakhe udinga ukuthi aqede umsebenzi ngesikhathi bese ewuthumela kuyena.
Kungenzeka akwazi noma angakwazi ukuthi ajoyine izimpintshi zakhe uma sezidlala.Yilokho kanye okuyinkinga ngoba akafuni ukwehlulwa futhi akafuni ukuba ngumva wezinye. UWilliam Ashdern, omunye wabangani bakaRose futhi okhaliphe njengaye uhlela ukunikeza intombi yakhe indandatho yesethembiso. Manje uRose, uyehluleka wukuzibamba abhekane nomsebenzi wakhe. Yincwadi yamancoko futhi ilandisa ngezinselelo zomjolo nokunye.