ISITELEKA sabasebenzi baseTransnet emachwebeni ehlukene kuzwelonke siphinde sembula izinqe abaholi bakahulumeni ngokusukuma ngemuva kwendaba.
Kunenkolelo yokuthi izinkinga eziningi ezibhekene nezwe zidalwa wukuhudula izinyawo kwabaholi ukusukumela izinto zingakonakali. Batatazela ngoba umlilo sewusha ubuhanguhangu.
Njengoba kuqale isiteleka sikazwelonke samaholo eTransnet ngeledlule kuvela ukuthi umnotho waseNingizimu Afrika ulahlekelwa yimali ephakathi kukaR100 million noR1 billion ngosuku.
Ngaphambi kokuba isiteleka sishube, bekusobala ukuthi kuzophetha ngokukhinyabezeka komnotho uma kungaqhanyukwa nesixazululo esisheshayo.
Ngaphandle kweCovid-19 eshiye kukhalwa emhlabeni jikelele, iNingizimu Afrika ibhekane nezinye izinselelo ezikhubaze umnotho njengezibhelu zanyakenye nezikhukhula zango-Ephreli.
Lokhu kukhomba ngokusobala ukuthi akufanele kuvunyelwe okunye okungase kuthikameze ukusimama komnotho.
Ekuqaleni kwesonto kume nse ukusebenza echwebeni laseThekwini ababhikishi bevale zonke izintuba ezingenela kulona.
NgoLwesibili izingxoxo zamaholo eCCMA phakathi kweTransnet nezinyunyana okubalwa kuzona iSouth African Transport and Allied Workers Union ne-United National Transport Union, aziphumanga nasixazululo.
Abasebenzi bafuna ukukhushulelwa amaholo ngemali ephakathi kuka-12% no-13%. Abaqashi babeke etafuleni u-4.25%, 5% nemali enguR5 000 umsebenzi ngamunye azoyithola kanye.
Izimboni ezahlukene kuleli, okubalwa nezolimo zisebenzisa amachweba ukuthutha impahla engenayo nephumayo kuleli.
Ngakho ukuqhubeka kwesiteleka isikhathi eside kungaholela ekulahlekeni kwemisebenzi eminingi ezimbonini ezahlukene.
Lokhu kungadala usizi phezu kolunye njengoba silokhu sikhule njalo isibalo sabantu abangasebenzi ezweni.
Okwenzekayo kufanele kube yisifundo kubaholi, basukumele izinkinga zingakashubi. Izinkinga ezinjengeziteleka ezinkampanini zikahulumeni aziphuthunywe zisavele ngamakhanda - kuphele ukuzithela ngabandayo kubaholi.