BAZOBE beqala ukusebenza ndawonye uWarren Masemola noVusi Kunene, selokhu bangena emkhakheni wezokulingisa.
Phambilini, bobabili balingisa kwiSibaya kepha ngezikhathi ezahlukene. Manje bazolingisa emdlalweni iHouse of Zwide kusuka ngoSepthemba 19.
UWarren uzolingisa indawo ka-Alex Khadzi, osemkhakheni wemfashini futhi ozodlisela nganxanye kuFunani (Vusi) ngemisiko yakhe.
Echaza ngendawo azoyilingisa, uthe uthunga imisiko emihle futhi ungumuntu ohlala ephapheme, ejabule kanti imisiko yakhe idonsa amehlo.
‘’Uma umchaza kulesi sikhathi esiphila kusona uyingxenye yentsha yamanje, udumile kuleli futhi useqala ukuzakhela igama emazweni aphesheya kwezilwandle. Usephumelele ngendlela yokuthi ungomunye wentsha eke yaba sohlwini lwabenza kahle ekuForbes ‘’under 30” futhi useke wawina imiklomelo okubalwa kuyo iLVMH, njengomsiki wengqephu osemncane,” kuchaza uWarren, ngendawo azoyilingisa.
Uthe yize u-Alex engumuntu ophumelelayo empilweni kodwa ungumuntu onehliziyo embi, wasonga kanje: “Unenzondo enkulu ngoFunani, ufuna ukuqeda ngenkampani iHouse of Zwide ngoba ufuna abantu bakhohlwe iyona futhi amdicilele phansi uFunani nakho konke anakho nemisiko yakhe nekusasa lomndeni wakhe.”