KUNGEKUDALA kade bezikhiphele eFrance ngeledlule, manje uSomizi Mhlongo usethembise isithandwa sakhe uMohale Motaung umshado.
Emuva kokuthi kade behambile uSomizi ubelokhu eshutha izithombe ezifaka ku-Instagram wakhe.
Izolo ekuseni ufake i-video ekhombisa indandatho esihambisana nombhalo wokuthi uvumile.
Ngemuva kwalokho kube nendathane yemiyalezo ebivela kosaziwayo.
Kuthiwa nasohlelweni akulo, iFresh Breakfast, bamshayele ucingo kodwa ubengekho enza umsebenzi wama-Idols.
Imenenja yakhe, uThato Matuka, uthe ngeke akwazi ukuqinisekisa lokhu ngoba wudaba oluthinta uSomizi ngqo.
Khonamanjalo, uSomizi uzolandela abane osaziwayo asebeke babonakala ohlelweni iComedy Central (DStv channel 122) kuhlekiswa ngaye.
Uhlelo iComedy Central Roast of Somizi luzokhonjiswa ngoMeyi 7 ngo-9 ebusuku.
Phakathi kwasebake babonakala kulo kubalwa uJustin Bieber, Donald Trump nabanye. AbaseNingizimu Afrika aseke babonakala kulo nguSteve Hofmeyr noKenny Kunene.
Esitatimendeni uSomizi uthe ujabule kakhulu.
“Ngesikhathi iComedy Central iza kimi angizange nginanaze. Kade kwasa ngifuna ukuba kulona. Ngingakwazi ukumelana nalo mlilo ngoba angizweli kalula,” kusho uSomizi.
Isikhulu sakwaComedy Central, uDillon Khan, uthe bayachichima yinjabulo ngokwethulela ababukeli babo uhlelo lweRoast noSomizi nakwiShowmax.
“Abantu baseNingizimu Afrika bahlale bejovana mihla namalanga futhi nohlelo lwethu siluthanda lunjalo,” kusho uKhan.
Uhlelo luzoqoshwa eThe Lyric Theatre, eGold Reef City, ngo-Ephreli 26. Amathikithi atholakala eComputicket ngoR200 umuntu ngamunye.