UMCULI we-Afro pop, uNaledi Aphiwe Mnyongwane, ubambe umoya njengoba uMnyango wezeMfundo kuleli uzokhipha imiphumela yalabo abebefunda uGrade 12 nyakenye ngoLwesibili.
Ekhuluma neSolezwe Ngempelasonto, uNaledi Aphiwe (18), obenza umatikuletsheni eKhethokuhle High eNanda, uthe uthwale kanzima kakhulu kulo nyaka ngenxa yengcindezi abeyifakelwa umculo, nodumo.
"Bekunzima kakhulu, angifuni ukuqamba amanga (kangangoba) kuTerm 1 angikwazanga ngisho ukuphasa kahle,“ kuchaza uNaledi.
Uthe obekwenza kube nzima ukuthi ubehlulwa ukulabhalansi umsebenzi wokucula, nowesikole.
"Kwesinye isikhathi bebengifuna ukuba ngiyocula, ekubeni esikoleni kunamakilasi engeziwe (extra classes). Yonke leyo nto beyenza kube nzima kakhulu."
Nakuba kunjalo uNaledi Aphiwe uthe ukwazile ukuqhubeka nokufunda kanye nokunandisa emicimbini abesuke eqashwe kuyo.
"Ngilindele nanoma yini kodwa ngingajabula uma ngingaphasa ngoba ngisebenzile kanzima ku-term 4. Ngakho ngilindele okuhle. Ngilindele nje ukuphasa," kusho intokazi eyafunda amabanga aphansi eMzomusha Primary.
U-Aphiwe uthe ingcindezi abeyifakelwa ngabalandeli bakhe icishe yamphazamisa. Uthe inkinga yodumo ukuthi awukwazi ukuphila impilo efiswa nguwe kodwa kufanele wenze okufunwa ngabantu ngoba bayakuthanda. "Bafuna ngibe yinto abafuna ukuyibuka."
Mayelana nokugxekwa akuthola ezinkundleni zokuxhumana uthe akazihluphi ngakho kodwa unaka okuhle kuphela okushiwo ngabantu.
Lo mzwilili ukhiphe ingoma evusa umunyu ngenhloso yokuhlonipha uWinnie Khumalo oshone ngoLwesibili. Uthe okumenze avalelise kuWinnie ngale ngoma yingoba akalitholanga ithuba lokwenza lokho mhlazane eshiwe ngunina ngo-2022 futhi kwaKhumalo yikoninalume.
Kwenzeka lokhu nje uNaledi Aphiwe, usanda kuba ematheni ngenxa yokuthukana kwakhe nodadewabo kaMawhoo, u-Amahle ezinkundleni zokuxhumana.
U-Amahle ubemsola ngokuthi wathwala ngonina. KwiMthandeni Summer Experience ukhishwe sekukubi ejikijelwa ngabantu ngamabhodlela ngenxa yokuthi unandise kusenoGatsheni esiteji. Nakuba kunjalo uxolisile futhi noGatsheni wamxolela.
Lo mculi udume kakhulu emhlabeni wonke ngenxa yokunconywa nguChris Brown, futhi waze wapika iphimbo likaNaledi Aphiwe engomeni ethi Shooter.
Babuye babonana okokuqala ngenyanga edlule ekhonsathini kaChris Brown ebiseFNB Stadium eSoweto.