USHONE ebuya konandisa emcimbini obuse-Ethopia, uDJ wama-piano wodumo lwengoma ethi Umshove nethi Konka.
Isolezwe Online lizwe ngomthombo walo osondelene nomndeni ukuthi u-Amahle "DJ Mbali Umshove" Nduli (27) waseKokstad ubewumqemane ngesikhathi efika esikhumulweni sezindiza ngeSonto.
Yize umndeni ungakazi ngembangela yokushona kukaDJ kodwa umthombo uthe indaba iqale ukonakala ngoMsombuluko ekuseni ngesikhathi umufi ekhukhunyalelwa yintamo njengomuntu ohlaselwa wuzagiga.
"Kube sekuphuma kuye okusaketshezi okumhlophe. Kube sekulandela okusaketshezi okunsundu. Uphumile ethi uyoshaywa ngumoya emnyango kanti usezoquleka."
Umthombo uthe bamphuthumise kadokotela umufi kodwa wadlula emhlabeni. Izindaba zokushona kukaMbali Umshove zidalulwe wumndeni ngoLwesibili ngesitatimende osifake ekhasini lakhe le-Instagram.
Selokhu zizwakele izindaba zokushona kukamufi, amaciko abemazi asina ededelana ngokubhonga emswanini.
Yize inkonzo yesikhumbuzo sikamufi beyiseMaboneng, eGoli ngoLwesithathu kodwa kuze kwashaya isikhathi sokushicilela kungakaziwa ukuthi inkonzo yomngcwabo izokuba kuphi futhi ngaluphi usuku.