ISIQUMAMA uShawn Mkhize, sithi njengawo wonke umuntu naso siyahlangabezana nezinkinga, yize abantu becabanga ukuthi konke kumhambela kahle.
Ukusho lokhu ngesikhathi kumenyezelwa isizini yesibili yohlelo olulandisa ngempilo yakhe iKwaMaMkhize, esizokhonjiswa kuShowmax kusuka ngoDisemba 14.
Lolu hlelo lwenze kahle kakhulu kuMzansi Magic ngonyaka odlule, lugcine luhamba nezindondo okubalwa iBest Reality Show kumaHollywood and African Prestigious Awards. Akasalanga ngaphandle uShauwn waqokwa emkhakheni wePersonality of the Year emcimbini wangonyaka odlule amaDStv Mzansi Viewers’ Choice Awards.
Le mpunyela yaseThekwini, ichazile ukuthi ngesizini yesibili kuzobonakala izingane zakhe esezikhulile, abazukulu kanjalo nomakoti.
“Ngesizini yesibili ngizoqhubeka nokubonakala nezingane zami u-Andile, uSbahle kanjalo nomakoti wakwami uTamia. Isizini yokuqala yayibheke kakhulu ekuzitholeni ukuthi ngingubani futhi kwakukhona isimo engangisanda kudlula kusona. Ngakho ngangisazibheka kabusha. Kule sizini entsha abantu bazobona uhlangothi oluhlukile lwami. Izingane zami zikhulile kakhulu, senginanabazukulu, umzuzu nomzuzu ngiyawujabulela kakhulu. Impilo ihluke kunalokhu abantu abebekade bekwazi,” kuchaza uShauwn.
Uqhube wathi kulokhu uzovuleleka nakakhulu ukuze abantu bambone futhi baqonde ukuthi ungubani ngempela.
"Kunezinkulumo nemidlinzo eminingi ngami futhi abantu bayazicabangela nje ukuthi ngempela ngingubani futhi ngiphila yiphi impilo? Ngakho ukwenza izinhlelo ezifana nalezi kungenza ngijabule ngoba ngikwazi ukuveza khona uShauwn nokuxoxa udaba lwami, ngisebenzisa amazwi ami ngingakhulunyelwa omunye umuntu,“ kuchaza usomabhizinisi.
Uthe izinkinga ezikhona empilweni yakhe nokuhle okwenzekayo uzokukhombisa ohlelweni njengoba bake babhekane nezimo ezinzima. Wathi kuzobonakala ukuthi uzibheka kanjani izingqinamba.
"Ngiyathemba abantu bazofunda ukuthi noma izinkinga zingaba ngakanani kodwa kuyaphumeka kuzo,“ kuchaza uMaMkhize
Le sizini entsha iqoshwe yinkampani iPOP24, esiyenze izinhlelo ezehlukene kuShowmax okubalwa kuzo iBae Beyond Borders, This Body Works For Me neThe Mommy Club.