Kaizer Chiefs (1) 1
SuperSport United (2) 4
Kubuye isifo seKaizer Chiefs obekucatshangwa ukuthi sesilaphekile ngesikhathi ibhudluzwa yiSuperSport United emdlalweni weBetway Premiership eFNB Stadium, eNasrec, ngoLwesibili ebusuku.
Amagoli enqobe ngawo iSuperSport ashaywe nguSamir Nurkovic noChristian Saile esiwombeni sokuqala. Amanye aqotshelwe phakathi nguGamphani Lungu noSiphesihle Ndlovu kwesesibili. EleChiefs lishaywe nguGlody Lilepo esiwombeni sokuqala.
Amakhosi bekubhekwe ukuthi aqhubeke nomgqigqo wakamuva obukade usubuyise injabulo kubalandeli bawo kwazise emidlalweni emibili yakamuva ashaye iStellenbosch ngo 1-0 koweligi neChippa United ngo 3-0 koweNedbank Cup. Kunalokho, kubuye isifo sawo sokuvuzisa amagoli esidida ngisho umqeqeshi, uNasreddine Nabo, osalwa nokuthola ikhambi lokuselapha. Kule sizini, iChiefs ibalwa namaqembu aselande ibhola izikhawu eziningi kunawo wonke kwazise isingenelwe ngamagoli angu-23 emidlalweni engu-18. Iqembu eselingenelwe ngamagoli amaningi kuneChiefs, yiMarumo Gallants esililande ezintanjeni amahlandla angu-27 emidlalweni engu-16.
Enkundleni, kubonakale zibekwa ukuthi iSuperSport ifuna ukusebenzisa ijubane nezikhala ezishiywa ngabadlali basemuva beChiefs ezinhlangothini. Lokhu kusheshe kwaphumelela ngesikhathi uLungu egobela ebhokisini ibhola kwesokudla, lahlangana noNurkovic, walibhajiswa ezintanjeni ngomzuzu wesithathu.
ULilepo uphendulele iChiefs ngomzuzu ka-30 kodwa uSaile wakucisha konke lokho emuva kwemizuzu emibili.
Esiwombeni sesibili, iSuperSport ibuye isigcwele ukuzethemba kakhulu. Ukuhlasela kwayo iphindelela kuyihlomulisile ngesikhathi uLungu eqobela phakathi elesithathu laMatsatsantsa. Emuva kwegoli lesithathu leSuperSport, iChiefs igqemeke engeqiwa ntwala kukhishwa ngekhadi elibomvu uGaston Sirino ngomzuzu ka-69. Lokhu kuyithwese ubunzima kwazise kudingeke uNabi enze izinguquko ukuze iqembu lizoqhubeka nokuhlasela. Ngaphandle kwalokhu, iChiefs ilinyalelwe nguHappy Mashiane obengene esiwombeni sesibili endaweni kaBradley Cross obehlulwa wumdlalo. Amathemba eChiefs ashabalale wonke sekusele imizuzu eyisikhombisa kuphele umdlalo ngesikhathi uNdlovu eshaya ingcwenga yegoli emuva kokuthola ibhola ebhokisini.
Amakhosi ayoze abuyele enkundleni ngoMashi 1 eseyobhekana neMamelodi Sundowns koweligi eLoftus Versfeld Stadium, ePitoli.