UMLINGISI wodumo likaQueen Ibanathi kwiFalakhe neNdlovukazi uNandi kwiNandi The Musical, uNtokozo ‘Sngqazu’ Ngcobo, uyomela iTheku embuthanweni wokwabelana ngolwazi kwabalobi bezincwadi iNanjing Writers' Residency Program, eNanjing Literature Centre, eChina kusukela ngesonto elizayo.
UNtokozo uthe uzolifulathela elakuleli ngoMsombuluko aze abuye ngoNovemba 29. Uthe uyingxenye yababhali abazobe bemele amadolobha awu-36 amazwe ahlukene, anababhali abasekhaleni lokuqhakambisa ukubhalwa kwezincwadi ngaphansi kwe-UNESCO.
"Amaciko asuke enikezwa ithuba lokuqhakambisa nokuthuthukisa amakhono awo kusukela ekuqaleni kukaNovemba kuya ekupheleni kwawo," kuchaza uNtokozo.
Uthe uhlelo lwalo nyaka lubandakanya imicimbi yokwethulwa kwezincwadi, ukuhambela amakilabhu okufundwa kuwo izincwadi nezinkundla zokucobelelana ngolwazi phakathi kwababhali abasacathula nasebemnkatshubomvu.
UNtokozo uthe uze abambe iqhaza kule ndumezulu yembizo yingoba wafaka isicelo kubagqugquzeli bayo. Uthe ubengaqali kulo nyaka ukungqongoza kodwa bese kuwunyaka wesibili ephaphatha kubahleli kodwa izicelo zakhe beziphuma inqina kamabuyaze.
"Ngafaka isicelo salolu hlelo kusukela eminyakeni emibili eyedlule ilandelana, ngangaba nayo inhlanhla. Kwathi uma sengiphinda ngifaka isicelo phakathi nalo nyaka, emuva kwempumelelo yochungechunge lwencwadi yami eNanjing, avela amadlelo aluhlaza".
UNtokozo uthe lolu hlelo ludinga ube ngumbhali osenamava eminyaka emithathu eyibambile kulo mkhakha, noma okungenani onomsebenzi owodwa oshicilelwe, noma othole imiklomelo ngemisebenzi yakhe yokubhala.
Kulolu hambo uNtokozo uzothola ithuba lokuba nezingxoxo nababhali baseNanjing, izimbongi, abahumushi, abalingisi, ababhali bemidlalo yethelevishini nezinhlangano zabalobi nabafundi.
Esephetha uNtokozo uthe ulwazi azoluthekela kulo mbuthano uzobuya ahlomise ngalo ozakwabo abasafufusa kulo mkhakha wokubhala nokuhaya.
"Ngizohlela izinkundla zokucobelelana ngolwazi lokubhala, kube khona abalobi engibacijayo, ngihlele imicimbi yokunikeza ababhali ithuba lokuqhakambisa amakhono abo futhi ngisebenzisane nezikole ukuvumbulula amakhono."