Isolezwe ngeSonto lithole ngomthombo osondelene nabo ukuthi isimo asisihle phakathi kwabo kodwa yinto ekhulunyelwa phansi.
Kuthiwa indaba isuswe yizinsolo zokuthi u-Andile usethandana noBrinnette Seopela owaziwa ngohlelo lwethelevishini, iThe Real Housewives of Johannesburg.
Kumanje uNonhle Ndala Jali ucishe ngisho nekhasi lakhe le-Instagram abehlale evela kulona nomndeni wakhe.
KwelikaJali ikhasi, lo mdlali akasaveli enonkosikazi wakhe uNonhle kodwa useshutha nezingane zakhe kuphela. Unkosikazi wakhe uvela ezithombeni ezindala abazishutha isimo singakabi sibi ngalolu hlobo.
“UJali ungena esilingweni sokuthi aze athandane nomunye wesifazane kungenxa yokuthi akahleli kahle noNonhle. Inkinga kaJali, ukuthi uNonhle akamhloniphi, umbukela phansi. Into ayilibalayo ukuthi nemisebenzi ayitholayo ngoba unenkampani yokupheka, uyithola ngenxa yokuthi kwaziwa ukuthi ungunkosikazi kaJali odumile, kodwa akakuqapheli lokho.
“UJali usekhathele yindlela aziphatha ngayo umkakhe futhi uyazisola ngokumenza unkosikazi,” kusho umthombo.
Ethintwa uJali ukuphikile ukuthi uthandana noBrinnette, wathi bangabangani.
“Sisendawonye nomkami uNonhle kodwa asisathandani. Ngabe usumbuzile yena unkosikazi wami ngale ndaba,” kubuza uJali.
Uma etshelwa ukuthi ubuziwe kodwa akaphendulanga, uJali uqhube wabuza ukuthi uBrinnette ubuziwe yini.
Uma etshelwa ukuthi ubuziwe, uJali ufune ukwazi ukuthi utheni, okuthe uma kuvela ukuthi akaphendulanga uBrinnette, naye wangabe esanda ngamaningi.
Kuthunyelwe imilayezo kuNonhle noBrinnette, kepha abayiphendulanga bobabili.
Kwenzeka lokhu nje, kuyindaba eyaziwayo ukuthi uJali ubengahleli kahle nonkosikazi wakhe.
Lokhu kuza emuva kokuba ngoJanuwari nonyaka, uNonhle ehlambalaze uJali ezinkundleni zokuxhumana nge-video ayiqopha ethi akanamali lo mdlali ngoba iSundowns imholela amakinati.
Kuleyo video waveza nokuthi uJali udinga umsizi, wathi yena (uNonhle) uma engasekho eNingizimu Afrika ekwamanye amazwe usuke engaseyena umshadikazi futhi usuke ekubhekile ukuthola umuntu azothandana naye.
Emva kokugxekwa ngabantu, wabuye wenza enye i-video exolisa ngakushilo.