UMSAKAZI wohlelo lwasekuseni kuKhozi FM, uNonhlanhla “Mroza Wangempela” Buthelezi, umele iNingizimu Afrika kuma-Africa Choice Awards azoba seNigeria, ngoFebhuwari 16.
UMroza osakaza noSgqemeza Mbatha iVuka Mzansi Breakfast Show, uqokwe emkhakheni we-OAP (On-Air Personality) of the Year, lapho eqhathwe khona noMpumi Mlambo weMetro FM, uKemi Smalls (Nigeria), Onjema Chiwete (Nigeria), Kamene Goro (Kenya), Massawe Japanni (Kenya), Kozo Yankson (Ghana), AJ Akouko (Ghana), Azeezah Hashim (Kenya) no-EmmCee RNB (Nigeria).
Kwenzeka lokhu nje, lo msakazi uhlabane ngomklomelo we-Entertainment Radio Presenter of the Year kumaBasadi In Music Awards ngo-Agasti.
Imizamo yokuthola ukuphawula kukaMroza ayiphumelelanga kwaze kwashaya isikhathi sokushicilela.
Kushubile emkhakheni wePodcast of the Year njengoba kuboshelwe iPodcast and Chill with MacG, iL-Tido Podcast, iThe Penuel Show neThe Venting Podcast kaGogo Sikhotheni.
Umculi wamapiano, uKamo Mphela, TxC noTitoM&Yuppe, bakuleli baqokwe emkhakheni weNew Best Artist of the Year.
U-Akani Simbine noShaun Maswanganyi baqokwe emunxeni we-Athlete of the Year.
Ngokusho kwabagqugquzeli kwi-website yalo mqhudelwano wezindondo, kubungazwa kakhulu osaziwayo abavelele e-Afrika namaphethelo.
Bathe ukuvotelwa kwabaqokiwe kuzoqala ngo-Okthoba 7 kugcine ngoNovemba 8.
Ihlandla lesibili futhi lokugcina lizoqala ngoNovemba 9 kugcine ngoDisemba 10. NgoFebhuwari 14, kuzokuba ne-Africa Choice Awards Festival lapho abaculi bezobe beshiyelana inkundla.