OWAWINA umncintiswano wokuqala wokuthungatha oDJ besifazane iSmirnoff Shaya Ingoma, weluleke abakowamanqamu wakulo nyaka ngokuthi bangazami ukuzenza abanye. UNompumelelo “Rosetta D33P” Hlatshwayo odabuka eClermont, waphuma phambilinyakenye.
Ngempelasonto kuzosongwa owakulo nyaka emcimbini ozoba seGreyville Racecourse,eThekwini. Abangu-10 ababanga isicoco nguDiamond Guerilla, DJ Moira, DJ Nomali, DJThabithabs, LadySam, Bina Binnz, Mbali Vibes, Nia Brown, Lekouh_S noDJ Portia.
“Okokuqala nje okubalulekile ukuthi kumele ukwazi ukudijeya. Kumele uhluke,ube nguwe ungazenzi omunye umuntu. Ukholelwe entweni oyenzayo khona abantu bezoyibona,” kusho uRosetta D33P.
Uthe laba abasele kwiTop 10 kumele bazazi ukuthi bafuna ukuzuza ini ngoba lokho kuzohlale kuyisikhumbuzo sokuthi kumele basebenze kanzima.
“Uma ungazi uvele ulahlekelwe yindlela. Kumele bangakhohlwa futhi nokuzibandakanya nabantu abanolwazi olungcono kunabo. Kuthiwa indlela ibuzwa kwabaphambili. Abantu abanamava yibo ofunda kalula kubo ngoba basuke beyihambile leyo ndlela,” kuchaza yena.
Uthe ukunqoba kuyayishintsha impilo njengoba yena esaziwa futhi miningi neminyango evulekile.
“Kungiphonsele inselelo yokuthi ngikwazi ukuzimisela njengoDJ. Kungisondeze kwabanye engifunda lukhulu kubofuthi ngithola nokuqashwa.”
Uqhube wathi imincintiswano yalolu hlobo ibalulekile ngokuthi ivulele abanye besifazane amathuba ngoba kababaningi.
Umcimbi wokusongwa komncintiswano lapho kuzomenyezelwa khona onqobile uzoqala ngo-4 ntambama kuze kube wu-10 ebusuku. Uzosakazwa bukhonana kwiSABC1. Kulindeleke ukuthi kube khona abalingisi boZalo okunguSimphiwe Majozi, Masoja Msiza, Thuthuka Mthembu noNoxolo Mathula. Amajaji omncintiswano uDJ Oskido, PruLuv noSlenda Da Dancing DJ nawo kulindeleke ukuthi abe khona. USlenda uthe ubheka umuntu ogqamayo esiteji futhi okwaziyo ukuhlanganisa kahle izingoma.
“Ngibheka ukuthi uyakwazi yini ukuxhumana kahle nabantu basuke lapho bekhona bazodansa. Ngibheka ukuthi unalo yini ithalente.”
Ozophumelela uzothola imiklomelo eyingxenye kaR1 million. Ukuvotela iTop 10 kuyaqhubeka kwi-website yomncintiswano futhi abavotayo bazibeka ethubeni lokuwina uR10 000. Izolo emini bekuvela ukuthi ohamba phambili nguBina Binnz elandelwe nguLekouh_S noDJ Nomali endaweni yesithathu.