IQEMBU labesilisa abangoDJ nabayizithandani, iThe Billionaires lipike umculi ohlonishwayo likhipha eculweni lalo elisanda kukhipha ivideo yalo: Izinyoni.
UNgcebo Mdima ongelinye lamalungu eqembu, uthe kube yinto enkulu kubona ukupika uLizwi Mbatha ongumculi owaziwayo noqashwa kakhulu phesheya kwezilwandle.
“Ngikhuluma nawe nje kumanje unoxhaxha lwemicimbi aqashwe kuyona eRussia naseMoscow. Ukusebenza naye kuyinto enkulu kuthina njengoba engomunye wabaculi abahlonishwayo kanti naye uphrojuswe wuVolka Ndlovu.
“UNdlovu usesebenze nabaculi abaningi okukhona kubona oPrince Kaybee, Maphorisa, Professor, Dj Tira, TNS, Naak Musiq nabanye,” usho kanje.
Uthe njengoba beseyiqembu elisha, ukusebenza nabantu abahlonishwayo kuyabakhulisa futhi bakwaze ukuqopha naye ivideo yaleli culo naye.
Echaza ngevideo uthe bayishuthele eThekwini.
“Siyishuthele ezindaweni ezahlukene okuyiKwaMashu, isolwandle nasezindaweni zabadla izambane likapondo. Inhloso bekungukuveza lonke uhlobo lwempilo yaseThekwini nokuqhakambisa izindawo esiqhamuka kuzona,” kuqhuba yena.
Leli culo labo lisuselwe emlolozelweni owawushiwo esikoleni kudala ukhuluma ngezinyoni ezinhlanu ezazikhuluma ngendoda nesibhamu. Ingaphansi komunxa obizwa nge-Afro Gqom.