ISILOMO soKhozi FM, uKhathide "Tshathugodo" Ngobe, usethula uhlelo lomculo kamaskandi kuMzansi Magic Music iYash' Ingoma ngamaSonto ngo-5 ntambama.
Ohlelweni uTshatha usakaza noNtombi Mzolo, ongumethuli wezinhlelo kuMoja Love futhi oyindodakazi kaHhashi Elimhlophe no-Ebony. Ephawula ngalolu hlelo oluzoqala ngoJanuwari 15, uTshatha uthe bazobe benikeza abaculi asebemnkantshubomvu endimeni ithuba lokufukula ngolwazi abasafufusa.
UNtombi uthe leli yikhaya elisha elivulelwe abangani abahlanganiswe "wumculo ogijima negazi, umculo kamaskandi." UNtombi ube esenxusa abathandi balo mculo ukuba bahlanganyele nabo ukuzoshaya ingoma.
Omaskanda okulindeleke ukuba babonakale benza abadume ngakho kwiYash'Ingoma kubalwa Ihhashi Elimhlophe, Inkosi Yamagcokama, Khuzani, Sminofu, Ichwane Lebhaca, Mzukulu, Maqhinga Hadebe, Qadasi, Jaiva Zimnike nabanye.
Akukhona okokuqala uTshatha ethula uhlelo lwethelevishini. Uke wasakaza noTeboho Mahlaela kwiRoots kwiSABC 1 ngaphambi kokukhishwa wuNgizwe Mchunu. Wabuye wakhuza ibuya nakwiZiyaduma kuMzansi Magic Music eminyakeni eyedlule. Nasekulingiseni akazibekile phansi njengoba eseke wadlala emdlalweni owuchungechunge kwi-e.tv, iMbewu: The Seed.