UMSAKAZI ophinde abe ngumethuli wezinhlelo zethelevishini, u-Anele Mdoda, ubuya ngolunye uhlelo alukhiqizayo iReady Steady Cook South Africa ezoqala ngo-7 ebusuku, phakathi nesonto kwiS3 kusuka ngoMashi 18.
U-Anele ukhiqiza lo mdlalo ngaphansi kwenkampani yakhe iRose and Oaks Media ngokubambisana nePrimedia njengoba benza phambilini behlanganisa uhlelo i-The Masked Singer SA.
IReady Steady Cook SA, njengeThe Masked Singer SA, isuselwe ohlelweni lwaphesheya lwakuBBC. Kuzobe kuncintisana abantu nabapheki abaziwayo ngaphansi kwemizuzu ewu-20, bese izethameli ezizobe zikhona zisho ukuthi yibaphi.
Abapheki abaziwayo abazobonakala ngoWandile Mabaso, Neo Nontso, Fehmida Osman-Latib, Kamini Pather, Kelly Njokweni, Liziwe Matloha, Lorna Maseko, Lufuno Sinthumule, Mmule Setati noNthi Ramaboa.
U-Anele uthe uhlelo lwabo lufana ne-paella noma i-potjie yayo yonke into eyenza kube mnandi kwithelevishini.
"Siyajabula ngokuba noMoshe ozobe engumqondisi wakwithelevishini uma sekuvela imilingo yawo ezobe iphekwe ngamaqembu amabili azobe encintisana kwiReady Steady Cook South Africa," kusho u-Anele.
Abafuna ukuyopheka ohlelweni kumele bathumele uWhatsApp kubadidiyeli ku-068 675 2542.
Impinda yohlelo izobe ikhonjiswa ngo-3.30 ntambama kwiSABC 1 nakwiSABC 2 ngo-5.30 ntambama.