UDAWN Thandeka King, Nozuko Ncayiyane noMduduzi Mabaso bazoba ngabalingisi abaphambili emdlalweni othi DiepCity, ozoqala ngo-Ephreli 5, kwiMzansi Magic 161, ngo-8.30 ebusuku.
Lo mdlalo uzovala isikhala somdlalo Isibaya ozofinyelela emaphethelweni ngo-Ephreli 02.
Isolezwe like labika ukuthi uThandeka uyashiya emdlalweni Uzalo njengoba ethole amadlelo aluhlaza emdlalweni omusha kwiMzansi Magic.
Umdlalo Uzalo nawo ugcine ukuqinisekisile ukushiya kwalo mlingisi.
Okungavelanga ukuthi ushiya nini kuwona.
Kulo mdlalo, uThandeka uzobe elingisa indawo kaThandiwe ongumama othwele kanzima ohlala emjondolo nomyeni wakhe nezingane zakhe, enye yazo ngeyentombazane esanda kuphuma ejele.
UNomsa Philiso obhekelele imidlalo yakuleli kwaM-Net, uveze ukuthi kulo mdlalo kuzobe kugcwele ubugebengu obenziwa abesifazane abathathu.
“Kuzogqama kakhulu uNox okuyindawo elingiswa uNozuko Ncayiyane, ephasa nje u-matric wakhe ngamalengiso bese kuba nesigameko la kuzodutshulwa khona umfowabo uSibusiso (Tshiamo Molobi) oba yingxenye yezigebengu eziyobamba inkunzi endaweni yomntakabani eGoli, leli tulo elihlelwa inkunzi malanga yesigebengu esaziwa ngokuthi siwumatshingelana u-Elliot (Mduduzi Mabaso). UThandiwe, ngenxa uyokuthi indodakazi yakhe ingene ebugebengwini incane ngesimo sasekhaya, ucabanga ukuthi iyona enesandla ekufeni komfowabo, ibuya ejele nje akakayixoleli,” kuchaza uNomsa.
Uthe lo mdlalo ungomunye wezinhlelo zabo ezintsha ezizoqala ngenyanga ezayo ezinye abazozimemezela ekuhambeni kwesikhathi.
“Lo mdlalo uzokhombisa impilo ephilwa eminye imindeni kuleli. Isimo sendlala emindenini eminingi kuleli, udlame emphakathini esihlala kuyona. Lo mdlalo uzokuveza konke ngendlela okwenzeka ngayo, nokuthi abantu lezi zimo babhekana nazo kanjani futhi yini abayenzayo ukuze impilo iqhubeke ngaphansi kwazo,” kuchaza yena.
Lo mdlalo ukhiqizwe inkampani kaMandla N, iBlack Brain, la uMandla eveze khona ukuthi impumelelo yemidlalo ehlukene kubalwa indlela indaba exoxwa ngayo, abalingisi nothando nokuzinikela kwalabo abasuke behlanganisa lowo mdlalo.
“Silindele ababukeli balo mdlalo ukuthi babambe amakhanda njalo uma bebona impilo kaNox, ezophula izinhliziyo zabantu abaningi,” kuchaza uMandla N.
Omunye wabalingisi aveze ukuthi uzoba khona kulo mdlalo uHamilton Dlamini, ozobe elingisa indawo kaBonga.