UMDLALO wethelevishini, kuwo okulingisa phambili uNambitha Ben-Mazwi noSiyabonga Twala, uzovala isikhala sokhonjiswa kuMzansi Magic ngo-9 ebusuku, iGqeberha The Empire.
Empini iwona mdlalo owuchungechunge osuzokhonjiswa phakathi nezinsuku, kodwa manje ukhonjiswa kwi-Showmax.
Lezi zindaba zidalulwe ngokhulumela lesi siteshi, uPortia Hlongwane.
Ngokwesitatimende esithunyelwe kwabezindaba, umdlalo uzoqala ukukhonjiswa kuMzansi Magic kusukela ngoJanuwari 13 uma sekuphele iziqephu zeGqeberha ngoLwesihlanu lwangoJanuwari 10.
Umehluko ozobakhona manje ukuthi i-Empini izokhonjiswa kusukela ngoMsombuluko kuya kuLwesine ngo-9.
Siqhuba isitatimende sithe uNambitha wodumo kwi-The Queen uzobe elingisa indawo kaNdoni Themba, okuyintokazi engumqaphi wabantu abaqavile enkampanini ezimele. USiyabonga osehlabane kaningi kuma-South African Film and Television Awards (Saftas) futhi odume kakhulu enguMpiyakhe Zungu kwiSibaya, uzobonakala elingisa indawo kaKhaya Bhodoza, ongusomabhizinisi okwipolitiki ozobe ecija uNdoni.
Sesiphetha isitatimende sithe umdlalo uzobe unezigigaba ezihlasimulisa umzimba neziqephu ezingu-52.
*IMzansi Magic yisiteshi esisakazela kwi-DStv Channel 161.