OYINHLOKO yababhali bemidlalo yethelevishini futhi ozakhele udumo enguDabula kwiSibaya, uChris Q Radebe, ukhala esikaNandi ngokusolwa njengembangela yokuhoxiswa kwalo mdlalo kuMzansi Magic.
ISibaya sahoxiswa ngo-2021 isikhalo saso savalwa ngeDiepCity, nayo eyabuye yahoxiswa njengoba sekunoMkhokha The Curse.
UChris uthe yize Isibaya saphela sesibhalwa nguye kodwa akayona imbangela yokuqedwa kwaso.
"KwiSibaya ngangena njengomlingisi kuSeason 6. Ngahamba ungakapheli uSeason 6, ngashiya sengiyobhala Uzalo. Phakathi nendawo ku-season 8, abanikazi beSibaya beza kimi, bathi 'Chris sicela uze, uzosibhalela Isibaya. Sesiphelile, sesihoxisiwe i-season yokugcina le yeSibaya."
Ekhuluma kwi-Instagram, uChris uthe bamnxusa ukuba aqhubeke esiqeshini sika-85 aze asibeke esiqeshini sika-260.
Uthe bathi akaqedele Isibaya bese eyongena kolunye uhlelo lweThe Bomb.
UChris uphatheka kabi uma esebhecwa ngobende ekubeni inyama engayithanga mbibi.
"Angizange ngisiqede Isibaya. Yebo yimina owasibhala saze sayophela . Mina anginankinga nokudelelwa ngabantu abangangazi, abacashe ngemuva kwefoni. Anginayo inkinga nalokho. Ukudelelwa yinto ejwayelekile. Ngina-40 manje, ngeke ngethuswa ukudelelwa."
UChris uthe okumphatha kabi ukubona abantu abangu-299 bencoma umsebenzi wakhe wokubhala imidlalo bese kuba noyedwa nje olokhu emgxeka ngokuthi waqeda Isibaya.
"Anginankinga nokuthi ngidelelwe, kuthiwe 'wena ubhala umbhedo. Uyabona uma uthi Isifiso umbhedo, Icala umbhedo ne-One Weeks umbhedo. Lokho nami ngizokuvuma ngoba umbono wakho." Uthe inkinga anayo yile yokuthi kunohlelo lwabantu aluqeda.
"Ozakwethu engisebenza nabo bayangihlonipha ngoba bayawazi umsebenzi wami. Ngakho uma ufuna ukungeyisa, ngeyise ngomsebenzi obhekene nami."
UChris ubuye waveza nokuthi abanye baze bathi imali ayigezani.
"Anginankinga nalokho. Njengoba ngishilo. Ngino-40 mina, ngimdala. Akungithusi lokho. Ngisemncane komunye umuzi wakwaNgcobo kwakuthiwa ngimubi. Ngangingenankinga nalokho. Ngoba babengithanda labo bantu bakwaNgcobo. Babehleka uma bengibona, bathi 'ya mubi."
Uthe mubi futhi akumphathi kabi lokho ngoba kuqondene naye kodwa angakufuni okokuthi nguye owaqeda Isibaya.
Utshele abantu ukuba babukele umdlalo omusha ozokhonjiswa kwiYouTube osihloko sithi Ifindo ngoNovemba 11.