Kuvulwe ukwamukelwa kweziphakamiso zamagama abazohlonishwa ngendondo yeLifetime Achiever kumaSouth African Film & Television Awards (Safta) anonyaka.
AmaSafta, okuyimiklomelo yokuhlonipha abenza kahle kwezethelevishini namafilimu kuleli, kuzobe kungokuka-18 esingathwa.
Ukungenela kwabafuna ukuqokwa eminxeni eyahlukene kwakuzovalwa ngo-Ephreli 15 kodwa isikhathi salulwa kwagcina kuvalwa ngo-Ephreli 21.
Njengamanje sekuvulwe ithuba lokuthi abantu bathumele amagama ezingwazi abafuna ukuthi zihlonishwe emunxeni weLifetime Achiever. Nyakenye umklomelo wanikwa umdidiyeli wamafilimu uKoos Roets nowayengumethuli weCarte Blanche ongasekho uDerek Watts.
“Lo mklomelo unikezwa umuntu onamava futhi oseklame enkulu endima emkhakheni wezamafilimu nethelevishini kuleli naphesheya kwezilwandle,” kusho iNational Film and Video Foundation eyengamele amaSafta.
Akuwona lo munxa kuphela osekuvulwe kuwo ithuba lokwamukela imingenelo njengoba sekuthunyelwa nakoweYouth Achiever okuzohlonishwa ngawo owenza kahle oneminyaka engaphansi kuka-35.
Omunye ngowe-Outstanding Person with Disability Contributor okuzohlonishwa ngawo ophila nokukhubazeka owenza kahle, owe-Outstanding Provincial Contributor okuhlonishwa ngawo abakhulisa imikhakha yethelevishini namafilimu ezifundazweni zabo nowe-Emerging Filmmaker okuzohlonishwa ngawo osafufusa kulo mkhakha.
Imingenelo kumele ithunyelwe ungakashayi u-Agasti 9.
Kulo nyaka kungenzeka kushintshe izinto kule miklomelo njengoba ngoMeyi bekwamukelwa izicelo zezinkampani ezizohlela umcimbi.