LIYAVALWA namhlanje ithuba lokugcina lokungenela umncintiswano woDJ wakuSABC 1, i-1s and 2s.
Lo mncintiswano osubuya ihlandla lesibili, uthungatha uDJ ohamba phambili eNingizimu Afrika futhi akukhethile ukuthi udlala hlobo luni lomculo.
Kuthiwa awudingi ukuthi ube umdidiyeli womculo kodwa kumele ube nothando lwawo, uthandeke futhi ukwazi ukufunda ngokushesha
Masonto onke amajaji ahlulela abangenele bese kugcina kusale oyedwa ozohlomula ngemiklomelo yenani elifika kuR100 000.
Kulo nyaka umzuliswano wokuqala wemingenelo uthunyelwa online bese kuthi abakhethiwe badlulele emzuliswaneni olandelayo ozoba seGoli.
Phambilini ukungenela kwakuthiwe kuzovalwa ngoJanuwari 26, kodwa kwaphinde kwalulwa kuze kube yinamhlanje.
UDJ Tira ungomunye wabantu abagqugquzele oDJ abasafufusa ukuthi bangenele umncintiswano.
Ngokuthola kwaleli phephandaba, uTira uzoba ngomunye wamajaji kulo nyaka.
Imizamo yokuthola iSABC 1 ukuze iphawule igcine ingaphumelelanga njengoba owezokuxhumana uPhillip Mabitsela egcine engayiphendulanga i-email ayithunyelelwe ezinsukwini ezimbili ezedlule.
Ngokujwayelekile lolu hlelo ludlala ngasekupheleni konyaka.
Seluvumbulule oDJ okubalwa kubo uPrince Kaybee owanqoba ngesizini yokuqala, DJ Nastor, DJ SK noMvzzle owaphuma endaweni yesithathu ngo-2018. UMvzzle udume ngokusebenza noDJ Zinhle engomeni ethi Umlilo.