KULINDELEKE ukuba amajaji emqhudelwaneni wezindondo zamaciko abambe iqhaza emidlalweni ewuchungechunge kuleli, amaRoyalty Soapie Awards, aphathwe yikhanda kulo nyaka.
Yize kushube kuyo yonke iminxa kodwa obhekwe ngamehlo abomvu ngowe-Outstanding Lead Actress nowe-Outstanding Female Villain.
Okwenza amehlo amaningi athi njo kule minxa ukuthi uSindi Dlathu onguLindiwe Dlamini kwiThe River uqhathwe nontanga yakhe, uDeli Malinga onguMaMzobe kuMkhokha.
Ababukeli bale midlalo bayazi ukuthi uMaMzobe noLindiwe ngabesifazane abanenhliziyo embi futhi abanezidumbu phansi. Nakuba kunjalo kodwa laba balingisi bangase babhinciselwe nxanye ozakwabo abaqhathwe nabo kwi-Outstanding Female Villain, okukhona kubo uKhabonina Qubeka, Connie Chiume, Linda Sebezo noNokuthula Ledwaba kanti nakowe-Outstanding Lead Actress bangase bathole ubunzima koZikhona Sodlaka, Nomvelo Makhanya, Elizabeth Serunye, noJo-Anne Reyneke.
Nakubalingisi besilisa abavelele akulula neze njengoba emunxeni we-Outstanding Lead Actor kuboshelwe uMotlatsi Mafatshe, Themba Ndaba, Melusi Mbele, Sello Maake, Aubrey Poo noSiyabonga Thwala. Nakumunxa we-Outstanding Male Villain kududulana izinkakha okungo-Andre Odenaal, Mduduzi Mabaso, Lindani Nkosi, Otto Nobela, Cornet Mamabolo noBheki Mkhwane.
Umsunguli walo mqhudelwano uBawinile Ntshaba uthe amaRoyalty Soapie Awards akhula ngesivivini. Noma kunjalo kodwa uthe usafisa ukuthi bathole abaxhasi nakweminye iminyango kahulumeni ukuze akwazi ukunikeza abawinile izindondo ezihambisana nemali. Uthe abalingisi basemidlalweni ewuchugechunge basebenza ngokuzikhandla kodwa abakabungazwa ngendlela efanele.
Uthe abahlabene bazomenyezelwa emcimbini ongo-Agasti 24 eHeartfelt Arena ePretoria.
Kweminye iminxa kuqhathwe kanje:
Outstanding Supporting actor: Chrispen Nyanathi, Ayanda Makayi, Linda Nxumalo, Senzo Ngqobe, Andrian Mazive noMpho Sebeng. Outstanding Supporting Actress: Bianca Amato, Sana Mchunu, Harriet Manamela, Didie Makabone, Gina Koffman noMatshepo Sekgopi. Outstanding Newcomer: Six Nyamane, Nefisa Mkhabela, Nkone Mametja, Lebohang Mgidi, Lethabo Mekoa, Mahlatse Moropo.Outstanding young performer: Karabo Magongwa, Zikhethele Zondi, Litlohonllofatso, Jadon Booyson, Caleb Arnolds no-Ontirerse Radipane.
