IZILOMO zePodcast and Chill with MacG, uMcGyver “MacG" Mukwevho noSol Phenduka, baphinde bathola ingqayizivele yethuba lokwethula uhlelo lwethelevishini kuSABC 2, olusihloko sithi: Raid The Cage South Africa.
Lezi zindaba zidalulwe yizo lezi zinsizwa kwiYouTube Channel.
UMacG uthe bathole ucingo luqhamuka kubaphathi bakwaSABC 2.
"Mina noSol sithole ucingo kwaSABC bethi izibalo zababukeli ziyabheda. Kubi!" USol uthe kunezinguquko eziteshini zethelevishini kwaSABC njengoba iSABC 1 seyizogxila ezinhlelweni zentsha ekubeni ezikaSABC 2 kuzoba ngezibukelwa yiwo wonke amalungu omndeni.
"Angazi kwenzekani ngezinhlelo zikaSABC 3." UMacG uthe ujabule kakhulu ngokubuyela kwithelevishini emuva kweminyaka ebalelwa ku-20 agcina.
USol uthe benze kahle ngokuqasha abantu ngenxa yekhono, "besesikhathele ukubona abantu abaqashwe ngenxa yobuhle. Abanye beqashwe ngocansi noma ngoba bazana nabathize. Thina ngenhlanhla besingenamngani."
UMacG noSol bake basakaza iPodcast and Chill with MacG kuChannel 0 kodwa babuye bashiya ngenxa yokuthi babengafuni ukuyeka ukusakaza lolu hlelo lwabo kwiYouTube Channel.
UMacG wabuye wathola umsebenzi kwaSABC1 kodwa nakhona wakhonjwa indlela emuva kokuba enye yezimenenja zabaculi zakhalaza ngaye.
Isolezwe Ngempelasonto lithole ukuthi ababukeli bazobe bencintisana kulolu hlelo lwabo futhi lususelwe kwelaseMelika olwethulwa wumlingisi uDamon Wayans Jnr nosaziwayo uJeannie Mai.
Kuze kwashaya isikhathi sokushicilela lungakaziwa usuku lokuqala kohlelo.