"HAWU kodwa Nkulunkulu wami! Yini njalo uma kudlula iciko emhlabeni kube sengathi umnyango sewuvulela namanye amaciko ukube alandele. Nkosi Jesu Khrestu uze ube nesihe kithi."
Lawa ngamazwi ashiwo wumculi weqembu leR&B, amaTwins, uTebogo Sithathu, osengumholi weMK Creative Council emuva kokuzwakala kwezindaba zokudlula emhlabeni koqweqwe lomlingisi, uSello Motloung (54).
Izindaba zokuhamba emhlabeni kukaSello zimenyezelwe wumndeni wakhe ezinkundleni zokuxhumana. Yize umndeni ungachazanga ngembangela yokushona kwaleli qhawe kodwa umphathi wenkampani ebelingaphansi kwayo, u-Eloife Clasen, ucashunwe esitatimendeni ethi umufi udlule emhlabeni esibhedlela emuva kokuquleka kwakhe.
"Uvele waquleka ekwakhe ngezithuba zabo-1 emini. Umkakhe umthathe wamphuthumisa esibhedlela kanti uzoshonela khona ngezithuba zabo-5 ntambama," kusho u-Eloife we-Artist Connection.
U-Eloife uthe umndeni nozakwabo abesebenza nabo ngaphansi kwe-Artist Connection bagqemeke udume lwengozi.
USello ulingise emidlalweni eminingi yethelevishini okubalwa kuyo iThe Wife, Backstage, Generations, Rhythm City, Mamello, Isidingo, UBab' UStevovo neminye. Emafilimini abonakale kuwo kukhona nawaphesheya kwezilwandle njengeTarzan, The Epic Adventures, An Act of Defiance, Happiness is a Four Letter Word, How To Steal 2 Million namanye. USello uwole inqwaba yemiklomelo.
Ubabaza kanjena nje uTebogo, umufi ulandela ezithendeni zozakwabo abasanda kusishiya. Kuqale umlingisi uConnie Chiume ngo-Agasti 6. Kube sekulandela umsakazi nomethuli wezinhlelo zethelevishini, uZanele Mbokazi (52) ngo-Agasti 12 ngaphambi kukaThabiso Sikwane ohambe emhlabeni ngo-Agasti 30 emuva kokugula isikhashana. Ngakusasa kube sekulandela imbongi ebisidume umhlaba wonke, uJessica Mbangeni (47) naye ogule isikhashana. NgoSepthemba 5 kulandele inkakha yomculo wekwaito, uSandile "Mapaputsi" Ngwenya.
NgoLwesihlanu kuhambe emhlabeni usomahlaya owaduma emculweni we-hip hop neR&B, uPhilani "Umfundisi Ntshebe" Mabanga nomakadebona, uDarlington "Papa G" Michaels wodumo kwiSidingo.
