UMLINGISI wodumo uBrenda Ngxoli, uthi akazi kungani engaqasheki emidlalweni yethelevishini njengoba engabonakali.
UBrenda yintokazi eyabeka induku ebandla ekulingiseni ngendawo kaVuyokazi kwiHome Affairs, okungumdlalo owawukhonjiswa kwiSABC 1 phakathi kuka-2005 no-2005.
Ngale ndawo uBrenda waze waqokwa kwi-International Emmy Award ngo-2007. Kusukela lapho akabange esabheka emuva waze wahlabana ngomklomelo weBest Supporting Actress kumaSouth African Film and Television Awards (Saftas) ngendawo kaGladys kwiRockville, nekaPinky kwiSes'Top La.
Yize enamava kodwa usakuthola kunzima ukuthola imisebenzi.
Uphawule kanje uBrenda Ngxoli: "Bengilokhu ngizama ukuthola ukuthi ngibhedephi. Ngisho ngoba yebo, ngiyawalwela amalungelo ami kodwa bengingakaze ngaphumela esidlangaleni ukuthi ubani ungenzeni."
Uthe akazi noma unenkinga yokusebenzisana nabantu ngoba wake waxoshwa emdlalweni iHustle, ngenxa yokuthi akancokoli nabaphaquli.
Umlingisi uthe usola ukuthi yingoba engazwani neminye imikhuba eyenzeka kweminye imidlalo. Uthe kunomdidiyeli wemidlalo ayelingisa kuwo iMy Perfect Family, owafika endlini newayini kodwa abangenza lutho ngenxa yokuthi kwasuke kwafika umngani wakhe uChuma. Ngokuhamba kwesikhathi waxoshwa emdlalweni wethelevishini futhi indawo yakhe yathathwa ngomunye umuntu. Ubuye wathi kukhona owamtshela ukuthi okumenza angaqashwa ukuthi akamemeki eThekwini.
"Angazi kwenzekalani eThekwini. Kuyacaca kukhona okwenzekayo. Ngike ngasolwa ngokudla ngoludala. Baqinisile ikhekhe lami, alisona isitobhi sebhasi."
UBrenda uthe bakhona abathola imisebenzi ngokulalwa kodwa abangeke bavume. Uthe uyaziqhenya kakhulu ngomzimba wakhe.
"Kuyangixaka impela ngoba kunabalingisi abafika bengazilungiselele lapho kusuke kuzoqoshwa khona."
Yize abantu abaningi bake bakhalaza ngoConnie Ferguson kodwa uBrenda umtuse kakhulu.
Ubeke kanje uBrenda ngosebenzisana nabakwaFerguson: "Angikaze nganenkinga yemali nabakwaFerguson. Awukaze umholo wami ufike sekudlule isikhathi. Mina ngaqala ukuhola imali enkulu kwiFerguson Films."
Uthe baningi abantu abondliwe nguConnie kodwa abangambonganga.