UMSAKAZI owazakhela udumo esiteshini Ukhozi FM nakwiGagasi FM, uSbu Buthelezi, usabise ngokwembula izinqe abaphathi boKhozi. USbu ubhale ekhasini lakhe le-Facebook ukuthi uzogeqa amagula ngabaphathi adlule ezandleni zabo encwadini ayibhale ngempilo yakhe esihloko sithi The Greatest Version of Me: My Last 60 Days versus My 14 Years in Ukhozi FM.
Le nsizwa eyayiyintandokazi kubalaleli, idalule ukuthi izoveza ukuthi abaphathi boKhozi balakha kanjani itulo elalihlanganisa izitha zakhe ngenhloso yokuqeda ngaye.
USbu, owayesakaza uhlelo Indumiso olwalungungqaphambili oKhozini ngeSonto, wakhonjwa indlela kulo msakazo ngo-2022.
Inhlangano yezokusakaza kuleli, i-SABC, yakhipha isitatimende esasithi kuhlukane inhloko nesixhanti phakathi koKhozi noSbu emuva kwezinsolo eziningi ezaziyamanisa lo msakazi nokuqolwa kwabantu izizumbulu zemali, okuyinto abathi ingcolisa igama le-SABC.
USbu uthe le ncwadi ingezinye zezinhlelo aphezu kwazo kulo nyaka. Bekulindeleke ukuba enze ingqungquthela iRevival Summit eThekwini naseGoli kule nyanga, kodwa babuye bayihoxisa .
Uthe esikhundleni sokuchitha izinsuku eziyisikhombisa endaweni eyodwa, sebehlala ubusuku kwelinye idolobha ngaphambi kokudlulela kwelinye emini.
USbu uthe bazoqala ngoLwesithathu ngo-7 ebusuku badedele isikhangiso esizobe siqukethe yonke imininingwane, okubalwa amadolobha, izindawo, izikhathi, abaculi nezikhulumi abazobe behla benyuka nazo.
Uthe bazobuye bakhangise nge-YouTube Channel, Uhambo Podcast neListen To My Story Podcast.
"Konke lokhu kuzokwenziwa ngaphansi kwenkampani i-Universal Broadcasting Agency Pty Ltd."
Uthe bazobuye bethule ibhodi lamalungu asemnkantshubomvu emkhakheni wokusakaza.
"Abantu abalindele abanegama abazobe bebambe iqhaza kuleli bhodi. Sizokwenza inhlolokhono yabasakazi eThekwini naseGoli njengoba sethula isiteshi somsakazo esizosakaza amahora awu-24 nsuku zonke. Sizogcina sifake isicelo semvume yokusakaza kwalo msakazo ozobe usakazela e-KZN."
USbu uthe njengoba inkampani yakhe, Abombuso Group, izobe iqeda iminyaka elishumi ngo-Okthoba yasungulwa, bazokwethula uhlelo olusha, isikhulu sayo esiphezulu, nabantu abazobambisana nabo nolunye uxhaxha lwamabhizinisi azoba ngaphansi kwale nkampani.
Yize ongumngani omkhulu kaSbu, uThabani TS Dlamini, ekhombise ukuthi uyazazi lezi zindaba kodwa imizamo yokuthola uSbu ukuze aziphawulele ayiphumelelanga kwaze kwashaya isikhathi sokushicilela.